KUCHING, 14 Julai: Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol madah dikena ngetanka penyerakup di nengeri tu, mayuh macham pekara ti mesti dikenatika nyerangkung sukut nerima, ninga enggau nyerenih sada enggau langgur penemu pupu bansa.
Ku iya, enti nyema raban tuai kelia kelalu tinggi penemu, Sarawak enda ulih ngasaika pengelantang enggau pemaik baka ke dipeda kitai kemaya hari tu.
“Raban tuai perintah kelia bepun ari Kepala Menteri kitai keterubah dalam taun 1963, Tan Sri Datuk Amar Stephen Kalong Ningkan enggau sida ke bukai nampung chara ngatur nengeri maya nya.
“Sida napi pemar baka ke diasaika aki ini kitai kelia.
“Nyadi kitai enda ulih madah nama kebuah suba enda ngaga baka nya, nama suba nadai, nama aki ini aku suba enda meli telefon, alit ati ninga laban maya nya sigi nadai telefon.
“Nyadi, nya mih kebuah semua kitai mesti terus beserakup dalam mayuh macham penemu,” ku iya.
Abdullah ke mega Kaban Kunsil Nengeri (ADUN) Semop mansutka pekara nya maya dirandau ba Program Dialog TVS : 60 Tahun Sarawak Merdeka ‘Sarawak Maju Makmur’ ti dipancharka malam tadi.
Kelimpah ari nya, Abdullah madah diri seruran ngemataka gaya politik ba nengeri tu, taja pan bebida parti lebih agi maya mantaika langgur penemu ke ulih diserenih dikena ngemansangka Sarawak.
“Kitai endang nemu ukai penemu siku-siku orang aja diperati, tang mega ninga penemu ari orang bukai.
“Enti mayuh kitai bejuraika senentang sekeda pekara, asil ari pekara nya majak manah,”ku terang iya.-TVS
