KUCHING, 14 Julai: Nadai ngasuh tekenyit. Pia ku timbal Mandal Presiden Parti Pesaka Bumiputera Bersatu (PBB) Dato Sri Abdul Karim Rahman Hamzah beduduk ari pemujur sempekat kerejasama ke udah disain Parti Demoktraktik Progresif (PDP) dan Parti Sarawak Bersatu (PSB).
Ba penemu iya, Karim madah nadai penanggul enti kerejasama nya meri pemaik ngagai rayat.
Taja pia ari sukut penemu Gabungan Parti Sarawak (GPS), iya ngelempaika pekara nya ngagai pemintar Supreme Kaunsil Presiden GPS.
“Kitai nganti aja penemu Supreme Kaunsil GPS, pia mega Premier Sarawak Datuk Patinggi Tan Sri Abang Johari Tun Openg enggau bala ketuai GPS nengah sebengkah penerang rasmi udah tu lebih agi ari segi penemu GPS,” ku iya maya dirandau ba sebengkah pengerami ditu, malam tadi.
Berebak enggau nya, mayuh orang nanya kati bisi berakup entara PDP enggau PSB.
Tanya nya tebantai bekau ari Sempekat Pemereti Ati (MoU) ke udah disain Presiden PDP Datuk Seri Tiong King Sing enggau Presiden PSB Dato Sri Wong Soon Koh di Kuala Lumpur kemari.
“Udah tentu bisi orang nanya kati deka bisi pekara besai nyadi, ba penemu aku kitai ngadu pengawa siti-siti.
“Kitai bekerejasama ngambika kaban PDP enggau PSB bela mereti enggau nyendiaka pelasar ngagai renggat baruh endur bekerejasama,” ku iya maya pengerami.
PDP iya nya entara parti ke enggau numbuhka GPS begulai enggau PBB, PRS sereta SUPP.
PSB iya nya parti penyakal ba Sarawak.
Tiong madah :
“Nama utai ke digaga kami endang ungkup rayat, ungkup nengeri (Sarawak) nya kebuah kitai nempa kerejasama lalu ngarapka dudi jari ngembuan pemereti ati ke lebih badas,” ku iya.
Berebak enggau nya, Bernama bisi mansutka berita, PSB ti kala menang tiga penuduk ba Pengawa Bepilih Besai Nengeri 2021, udah madahka kuing penemu sida nyukung iring Menteri Besai Datuk Seri Anwar Ibrahim enggau Premier Sarawak Datuk Patinggi Tan Sri Abang Johari Tun Openg.- TVS
