KUCHING, 13 Julai: Sekeda jalai besai ba puak mengeri besai Kuching deka ditutup sementara nyerumba atur latih tumu enggau Program Bejalai Beraban Nyerumba 60 Taun Sarawak Merdeka, berengkah 18 nyentuk 22 Julai tu.
Entara kandang jalai ke kena tutup tu iya nya Simpang Jalai Main Bazaar, Lebuh Wayang, Jalai Gambir, Jalai Tun Abang Haji Openg nuju ke Padang Merdeka, Jalai Wawasan, Lampu Trafik RTM, Jalai Satok, Lampu Trafik Sekula Primari (SK) St Mary enggau Jalai Mc Dougall nuju ke Padang Merdeka.
Nampung penerang ari Unit Komunikasyen Perintah Sarawak (UKAS), atur latih tumu deka diatur kena 18 nyentuk 20 Julai ngaul pengawa ngempang jalai berengkah pukul 6.30 pagi nyentuk program nya tembu.
Udah nya, bekaul enggau pengawa ngempang jalai maya hari Program Bejalai Beraban nyerumba 60 Taun Sarawak Merdeka iya nya 22 Julai tu deka berengkah pukul 5.30 pagi nyentuk program tembu.
Nangkan ke nya, bisi enam bengkah endur disedia endur mensia mayuh engkah kerita ungkup sida ke ngulu program nya.
Entara nya, Resevoir Park, Taman Budaya, Green Hill, Begunan Saujana, Medan Entepan Kerita Top Spot enggau Dewan Suarah.
Beserimbai enggau Pengerami 60 Taun Sarawak Merdeka taun tu, bemacham program besai udah diperambu dikena ngerichahka agi pengerami ti berambaika jaku ‘Sarawak Maju Makmur’.
Bela bisi dirintai nyadi sebagi ari program tu iya nya Konvoi Sarawak Merdeka ti berengkah di Limbang kena 28 Mei tu tadi.
Udah nya, Program Beserumpu Nengeri, Konsert Rayat, Mandangkan Bungai Api, Mandangka Kapal Berias enggau Pengawa Bejalai Bebala Mayuh ba Padang Merdeka nyadi program kepenudi.-TVS
