KUCHING, 13 Julai: Mandal Presiden Parti Pesaka Bumiputera Bersatu (PBB), Dato Sri Abdul Karim Rahman Hamzah madah, Pengawa Bepilih Besai Nengeri (PRN) ba enam nengeri ke deka diatur kena 12 ogos tu enda ngeruga penuduk Perintah Penyerakup.
Ku Karim, sukung Gabungan Parti Sarawak (GPS) ngagai perintah ke megai menua diatu meruan tegap enggau deka diteruska.
“Sukung enggau kerejasama entara GPS enggau perintah ke diatu dalam ngatur perintah besai deka diteruska, taja baka ni pan pemutus PRN ba enam nengeri udah tu.
“Taja pia kitai ngarapka bala bakih iya ke disukung kitai menang ba PRN tu,” ku iya.
Karim ke mega Menteri Dagang Temuai, Industri Kreatif enggau Seni Pemerindang madah munyi nya pengudah Bejadika Pejalai Royal Kuching Cruise Ba Tebing Sungai Kuching Sarawak, ditu kemari.
Sebedau tu, Premier Sarawak Datuk Patinggi Tan Sri Abang Johari Tun Openg bisi ngulu Randau Begulai Enggau Ketuai Perintah Penyerakup ti betuaika Menteri Besai Datuk Seri Anwar Ibrahim ba Kuala Lumpur, kena malam Hari Dua. -TVS
