KUCHING, 10 Julai: Majalah Newsweek udah ngerintaika Palan Tungkul Ati Sarawak entara 100 sepital pemadu manah di rantau Asia Pasifik ungkup taun 2023.
Sapit Premier Sarawak, Dato Sri Dr Sim Kui Hian madahka, tu ngayanka Palan Tungkul Ati Sarawak nya entara siti sepital perintah ari Malaysia ti dirintai nyadi sepital pemadu manah dalam bidang perubat.
Dr. Sim ke mega Menteri Pengerai Mensia Mayuh, Pengawa Berumah Enggau Perintah Lokal Sarawak madah, nyema Sarawak diberi peluang megai kuasa autonomi ba bidang perubat, perintah Sarawak deka ngatur sepital enggau manah.
Ku iya ranking dalam Newsweek Amerika Syarikat nya ngayanka penegap Sarawak dalam ngatur Palan Tungkul Ati Sarawak.
“Reti nya, nyema orang Sarawak diberi peluang, kitai mega nemu chara baka ni ngatur sepital kitai.
“Kitai ukai semina nemu ngatur sepital, kitai ngatur iya enggau betikas dunya,” ku iya.
Iya mansutka jaku nya pengudah ngulu Licha Strategi Pemansang Pasca Covid-19 2030 ditu, kemari.
Udah nya, ngelansa senentang pengerembai Palan Riman Sarawak, Dr Sim madah, perintah Sarawak udah nyain sempekat enggau berintah besai ke alai perintah Sarawak deka melanja ungkus ngaga nya dulu enggau perintah besai meri wang turu ke patut diagih ke Sarawak ungkup projek bukai di nengeri tu.
Dr Sim madah diri udah nganjung surat ngagai Opis Menteri Pengerai Menua atas peminta Menteri Besai Datuk Seri Anwar.
Ba awak sama iya deka betemu enggau Premier Sarawak Datuk Patinggi Tan Sri Abang Johari Tun Openg ungkup berundingka atur ke patut enggau pemutus ti deka dipadahka Premier.
“Aku ngarap semua proses ulih dilengkaska laban pesakit riman enda sabar nganti pemutus politik.
“Tu projek ke udah lama tetanggul,” ku iya
ku iya nerang, abis nadai Sarawak patut diberi peluang ngayanka penau dalam ngatur palan riman enggau manah laban Sarawak bisi pakar perubat ti nyulut.
Iya andal nyema palan riman ulih dikemansangka, iya pechaya nya mega deka mujur dipejalai.-TVS
