BETONG, 8 Julai: Bala apai indai lebih agi ba menua pesisir bela dilalau ngambika terus ransing meransang bala anak mesti rindu belajarka subjek Sains, Teknologi, Injinir enggau Matematik (STEM) ke pemaik sida empu dudi hari.
Sapit Premier Sarawak Datuk Amar Douglas Uggah Embas madah enti sida tu teulih ke pemujur ba subjek nya sida deka ulih nangkup pengawa puang ti mayuh dibuka ba bidang teknikal.
“Tadi Kaban Parlimen kitai (Betong) bisi nyebut perintah deka mayuh begunaka penemu teknikal.
“Kemari, menyadi aku Janin Girie iya ke nyadi Tuai Pegawai Eksekutif (CEO) PETROS mega bisi betemu enggau aku di opis (Kuching) mega madah taun 2030 ila sida beguna enda kurang ari entara ari 20,000 ngagai 30,000 raban juruteknik ke landik ba bidang Sains Teknologi.
“Nya nyampau ke diguna sida PETROS, empai agi SMA, Hidrogen, Teknologi Baru (Teknologi Gadung) iya ke suah disebut Premier Sarawak.
“Nyadi peluang gawa nya chukup mayuh lalu kitai enda tau enda sedia enggai ke kitai ngining orang dudi hari,” ku iya.
Uggah ke mega Kaban Kunsil Nengeri (ADUN) Bukit Saban madah munyi nya maya Pengerami Ngintu Taun penumbuh Sekula Primari (SK) Nanga Gayau Ke-61 enggau Bejadika Buding Baru sekula nya ditu, kemari.
Berebak enggau nya, ku Uggah perintah Gempung Parti Sarawak (GPS) endang naka ulih ngiga jalai dikena ngemansang ke pengawa sekula di menua tu.
“Diatu kitai meda gaya bala kitai ke ditu kami tu semua anak orang kereja getah bekebun tang ari ketegal sekula Tuan Residen, Tuan D.O Emparie, Kaban Parlimen (MP), bala sida Kepala Pengajar enggau bala pengajar ditu nyengkaum aku empu bulih pendiau lebih nyamai ari apai indai kelia.
“Nya mih tuju perintah GPS naka ulih ngiga jalai ngemansangka pengawa ke sekula nya mih siti utai ke chukup beguna,” ku lalau iya.
Ba pengerami nya mega, Uggah bisi ngungkupka agih belanja dikena ngemanah perengkaguna sekula, meli kereban bacha nembiak enggau ungkup Gerempung Apai Indai enggau Pengajar (PIBG) SK Nanga Gayau.
Enda tinggal meri bantu belanja dikena nyukung pemansang pelajar ba SK Nanga Gayau iya nya Kaban Parlimen Betong, Dr Richard Rapu ti ngagihka belanja sepenyampau RM5,000 ungkup PIBG sekula nya.
Sama bisi datai Residen Betong, Richard Michael Abu Nawas, Pegawai Pelilih Betong, Alfred Geling Ason, Pegawai Pelilih Mit Spaoh, Lester Clement sereta ke bukai.-TVS
