SARATOK, 6 Julai: Jaku Iban ukai semina nyadi jaku komunikasyen aja tang mandangka identiti bansa ke patut dikemegahka.
Beduduk ari nya, barang sapa ti nguna jaku nya sekalika ba institusyen formal, industri kreatif tauka bukai patut ngembuan penyiru ke jaku nya lalu mesti bejalaika pansik tauka betanyaka ngagai orang ke tebangkar ngambika asil pengawa ke digaga nya manding dipeda.
Presiden Gerempung Pemansang Pelajar Jaku Iban (AeDIL) Mariam Sabai madah, ulah nguna jaku Iban ti enda tentu betul deka meri empas ke besai ngagai pemanah enggau penegap jaku Iban.
“Nya kebuah, ngelansa pasal isu ti nyadi sebedau ngepunka sesebengkah produksi lebih agi ti ngaul jaku Iban patut pilih mih pelakun ke nyengala landik bejaku Iban ngambika leka jaku ke disebut terang sereta ngena intonasyen ke betul.
“Gaga pansik enggau silik lalu anang enggau betanya enggau orang ke lati tauka tebangkar ba jaku Iban sebedau ngeluarka sesebengkah drama tauka filem,” ku iya.
Mariam madah munyi nya lebuh dipinta meri timbal penemu bekaul enggau isu jaku Iban ti dikemegauka ba media rama ketegal leka jaku Iban ti enda engkeman disebut sekeda pelakun dalam sebuah filem di menua tu, apin lama ke udah.
Udah nya, nimbal pekara ke sama ba penemu Chairman Serakup Anak Seni Iban Malaysia (PASIMA), Isa Lee madahka, isu ngena jaku Iban ti enda tentu betul ukai pekara ke baru.
Kebuah pia, ku iya laban pekara tu suah dipeda nyadi ba media rama nyengkaum ba industri lagu Iban.
“Ambika chunto, enti lagu Iban dikeluarka Radio Televisyen Malaysia (RTM) dia lagu nya dulu ditapis lalu meruan bisi panel ti meresa lirik lagu etnik di Sarawak.
“Nyema iya enda berapa betul dia lagu nya deka ditikalka baru ngagai produser, kompeni tauka penanyi ti nganjung lagu.
“Tang enti pekara tu bisi nyadi ba filem tauka drama aku enda berapa nemu enggau silik.
“Taja pia, dedini kitai nguna jaku Iban enti kitai enda ‘mereti’ nadai salah kitai betanya ngagai orang ke lebih nemu (tebangkar) agi laban ba Sarawak tu chukup mayuh orang endang landik ba jaku Iban,” ku lalau iya. -TVS
