PONTIANAK, 5 Julai: Bisi 15 iku pemekuh media dibaruh Serakup Besai Gerempung Pemberita Sarawak (FSJA) nemuai seraya gawa ngagai Pontianak, Indonesia berengkah ari 5 ngagai 8 Julai tu.
Raban tu diuluka Presiden FSJA Andy Jong Wan Joon enggau Mandal Presiden II Jacqueline R. David sereta dipasuk pengari ejensi media lokal enggau nasional baka Unit Komunikasyen Perintah Sarawak (UKAS), Bernama, RTM, TVS, TV3, Sin Chew Daily, Borneo Post, Suara Sarawak, DayakDaily enggau Utusan Malaysia.
Nangkan ke nya, pengereja pengawa begian protokol enggau konsulat ari Konsulat Besai Republik Indonesia di Kuching, Alexandri Legawa mega bisi nyereta program tu.
Ba program tu raban pemekuh media ditaga deka ngatur penemuai basa ngagai Gabenor Kalimantan Barat, Bapak Haji Sutarmidji M.Hum.
Kelimpah ari nya sida mega deka ngatur penemuai basa ngagai Wali Kota Pontianak, Bapak Ir. H. Edi Rusdi Kamtono MM MT, ditangkan enggau pengawa nyain sempekat pemereti ati (MoU) entara FSJA enggau Gerempung Pemberita Indonesia (PWI) Kalimantan Barat.
Program tu dipelanja Perintah Sarawak dibaruh iring Premier Sarawak Datuk Patinggi Tan Sri Abang Johari Tun Openg sereta disukung Konsulat Jeneral Republik Indonesia di Kuching. – TVS
