SARATOK, 3 Julai: Krian chukup begunaka sebuah balai raya ke lebih besai ngambika ulih muat mayuh mensia sereta lantang endur ngatur sebarang akvitivi komuniti.
Kaban Kunsil Nengeri (ADUN) Krian, Friday Belik madah peminta ngaga balai raya ke lebih besai di sitak nya kala dibantai ba Aum Kunsil Nengeri (DUN) taun 2021.
“Aku ngarika bala komiti minta ampun ngagai kitai ditu lebih agi kita ke duduk ba rintai belakang din nyangka enda lantang ketegal jauh.
“Tu aja mih endur kitai begempuru di Saratok ditu. Peminta tu kala dibantai aku maya aum DUN taun 2021,” ku iya.
Friday madah munyi nya maya Pengerami Ngiling Bidai Tikas Pelilih Betong 2023 ba Dewan SJK (C) Kyn Syn ditu, ensana.
Nya alai Friday, ngarapka peminta ngaga begunana balai raya nya ulih nerima perati ari perintah nengeri.
“Balai raya ke chukup beguna dikena kitai ditu ngatur program ukai semina ba renggat bagi menua tang mega program renggat nengeri,”ku iya.
Ungkup penemu, naka tu di Saratok semina bisi sebuah balai raya iya nya Dewan Sekula SJK (C) Myn Syn endur sebarang program tauka pengerami ke uih muat mayuh mensia.
Sama bisi datai ngulu pengerami nya Sapit Menteri Nembiak, Lumba Enggau Pemansang Dagang Sarawak, Dato Gerald Rentap Jabu, Residen Betong, Richard Michael Abu Nawas enggau bala tuai raban bansa. -TVS
