MUKAH, 2 Julai: Siku lelaki bedau dikelala identiti bebadi nyawa ba penusah aksiden di jalai raya Kilometer 74, Jalai Sibu-Bintulu, Selangau ditu tumu pagi tadi.
Penusah nyadi urung pukul 6.30 pagi, tudah ditemu udah nadai dipelaba ketegal kena lantak sebuah kerita ke lalu ngelarika diri.
Tuai Polis Pelilih Mukah, Deputi Superintendan Muhamad Rizal Alias madah, tudah ke bebadi nya bedarat lalu dipelaba peranak menua tu sereta bedau dikelala nyemetak.
“Pansik tumu polis beratika penusah nyadi maya tudah nengah jalai raya nya kena lantak sebuah kerita dipelaba datai ari tungga Bintulu nuju ke Sibu.
“Tudah dikenuku bebadi nyawa ba endur penusah nyadi ketegal balat bakal ba pala,” ku iya nengah sebengkah penerang sehari tu tadi.
Ku iya, tudah nadai bebaju enggau semina betanchut pandak dipeda gegaring ba tengah jalai raya.
Nitihka penerang mega, palan penusah nyadi sebagi ari jalai raya Pan Borneo ke ngembuan dua arung lurus enggau rata.
“Polis benung nyidi aris tudah enggau bangkai iya udah dibai ngagai Sepital Mukah ungkup pengawa buntas pansik,” ku iya.
Mensia mayuh ke bisi sebarang penerang pasal penusah nya dipinta datai ngagai balai polis ke semak, mantu mansik kes tauka betelefon nuju Pegawai Pansik, Inspektor Mohd Rahmat Jalimin ngena lumur 011-316271237 tauka ba lumur Indu Opis Polis Pelilih Mukah di 082-871222.
Kes dipansik nitihka Seksyen 41(1) Akta Pengangkutan Jalan (APJ) 1987. – TVS
