KUCHING, 2 Julai: Raban Nembiak Kelab Saribas diperansang mesti mereti enggau patut ngambi bagi ba Strategi Pemansang Pasca COVID-19 (PCDS) 2030 enggau nguna penumbuh Ejensi Pemansang Bagi Menua Betong (BDDA).
Sapit Premier Sarawak Datuk Amar Douglas Uggah Embas madahka pekara nya chukup beguna ngambika nembiak Saribas bisi ngambi bagi ba program ke dipejalaika ba baruh PCDS 2030 enggau BDDA.
“PCDS 2030 siti program ke chukup besai enggau diatu benung chakah dipejalaika perintah Sarawak.
“Nya mega dikena ngerurun strategi pemansang nengeri nuju pengelantang ekonomi, mungkur pekara rama sereta pemeruan rampa menua manggai taun 2030,” ku iya madah rambau Program Ngiling Tikai Gawai Dayak Raban Nembiak Saribas Club 2023 lebuh Hari Enam.
Berebak enggau nya, Uggah ke mega Kaban Kunsil Nengeri (ADUN) Bukit Saban nerangka BDDA iya nya ejensi pemansang wilayah Bagi Menua Betong ti dikena merambu, bejalaika sereta matau pemansang sosioekonomi sereta infrastruktur sechara mungkur semua aspek ke bekaul.
“Naka ke diatu mayuh program ke benung enggau deka dipejalaika ba baruh ejensi tu.
“Pia mega kitai mesti nemu sapa bagi orang ke ulih mantu nambahka tikas pengidup ngambika enda tinggal pemansang,” tandu iya.
Nya alai, iya ngelalau Kelab Nembiak Saribas ngatur program ti meri penemu enggau penerang ngagai raban sida pasal kedua-dua program nya awakka bisi pemereti seraya ngambi bagi dalam program ti relevan sereta meri pemanah ngagai sida.
Entudi ke nya, Kaban Parlimen Betong Dr Richard Rapu rambau program nya madahka raban nembiak Saribas mega mesti nyikap diri enggau pengelandik baru nyerangkung dalam teknologi kontemporari.
“Dunya diatu bepanggai ba guna Kecerdasan Buatan (AI) lebuh bejalaika pengawa lebih agi dalam industri. Nya alai kita semua anang sanggu nambahka pengelandik diri,” ku iya.
Dr Richard nerangka Sarawak diatu benung chakah ngalih ngagai teknologi gadung enggau digital. – TVS
