BETONG, 2 Julai: Chairman Pengatur Pengerami Pemakai enggau Seni Betong (BeFa Fest) 2023, Alfred Geling Ason berasai tepantup ati meda sukung mensia mayuh ti datai ngulu pengerami nya.
Ku iya, penatai temuai enda disadang manggai 4,000 iku laban sebedau tu raban komiti pengatur semina nagaka penatai temuai urung 3,000 iku aja.
“Aku berasai temegah amat ati laban kitai di Betong ditu ulih ngatur program Befa Fest 2023.
“Pemayuh mensia datai ke Betong ngemataka Befa Fest baka lemai tu chukup enda disadang dipelabaka aku manggai 4,000 iku,” ku iya.
Alfred madah munyi maya ngagai TVS rambau malam keterubah Pengerami Pemakai enggau Seni Betong (BeFa Fest) 2023 ke dipenyadika Kaban Kunsil Nengeri (ADUN) Layar Dato Gerald Rentap Jabu ba Dataran Medan ditu, ensana.
Berebak enggau nya, Alfred ngarap program BeFa Fest patut diatur besai agi dudi hari.
“Baka ke udah dipadahka penyanding penemu program tu, Dato Gerald Rentap Jabu pengerami tu patut diatur besai agi dudi hari.
“Nyadi alai, enti bajet kitai besai aku andal perambu tu deka ulih dikemujur lalu temuai ke datai ari dalam enggau luar Betong mega nyangka lebih mayuh,” ku iya.
Nangkan ke nya, ba penemu Kordinator Befa Fest 2023, Christina Peter madah diri berasai gaga laban enda nyangka BeFa fest nerima sambut ke chukup manah.
“Aku berasai gaga laban enda nyangka Befa Fest nerima sambut ke chukup manah ari Betong nyentuk ke kami empu palan endur bejual keterubah iya kami semina nyaran 90 buah tang diatu bisi 130 buah bansal bejual.
“Udah nya, bisi empat buah trak pemakai enggau empat buah kerita dagang dibuka nyadi semua nya chukup enda disadang, ngelui ari pekara ke disaran kami,” ku iya.
Udah nya, siku pedagang krafjari ari Debak, Rebecca Nanti Gawai madah, Befa Fest 2023 pelasar ke chukup engkeman ngagai raban pedagang bejualka produk pekayan ke bisi ngundan motif Iban.
Enda tinggal mansutka buah penemu diri, Tuai Rumah Bayai Gani ari Melaban Betong ngarap ke BeFa Fest terus diatur ba taun bukai laban diperati ulih mantu nyungkak ekonomi rayat di Betong.
“Nyadi aku arapka pengawa baka tu (Befa Fest) terus diatur dudi hari, pemanah iya laban ulih mantu ngangkatka ekonomi kitai lebih agi raban sida ke bedagang di Betong,” ku iya. -TVS
