BETONG, 1 Julai: Pemayuh temuai ke datai ba malam keterubah Pengerami Pemakai Enggau Seni Betong (BEFA) 2023 nyadi kelai penyerakup pupu bansa di bagi menua Betong meruan ‘idup’.
Sapit Menteri Nembiak, Lumba enggau Main sereta Pemansang Orang Dagang Sarawak, Dato Gerald Rentap Jabu madah, ari pemayuh penatai temuai ke chukup mayuh nya mega nunjuk ke perayat di menua betong seruran segulai sejalai enggau pangan diri.
“Lumur satu (pemayuh mensia ditu) tu nunjuk ke kitai segulai sejalai enggau nunjukka penyerakup semua kitai enda ngira bansa sekalika Iban, China, Melayu enggau ke bukai di Betong tu.
“Nya alai, terima kasih laban ulih ngatur BeFa Fest 2023,” ku iya.
Rentap ke mega Kaban Kunsil Nengeri (ADUN) Layar madah munyi nya maya bejadika Pengerami Pemakai enggau Seni Betong (BeFa Fest) 2023 diatur ba Dataran Medan, ditu kemari.
Udah nya ku Rentap, pemujur ngatur BeFa Fest 2023 nyadi kelai rayat di Sarawak ulih bibas ngatur ngatur sebarang pengawa.
“Pengudah 60 taun menua merdeka kitai endang peneka ngereja pengawa nitihka pilih diri.
“Tang pekara ke pemadu besai reti sepi aku iya nya penyerakup pupu bansa nadai milih ari ni pengarap semua bela ulih Segulai Sejalai,” ku iya.
Kelimpah ari nya, Rentap mega madah diri berasai temegah ati meda budaya sesebengkah bansa bela dirami bansa bukai di Sarawak.
“Nya mai reti budaya kitai udah ulih diterima semua baka ngajat ditu mayuh anak bala kitai bebansa China.
“Ari peda aku sida nyau lebih landik ari kitai (ngajat). Semua bansa bela uih begulai sama nadai penanggul ba sentang budaya enggau jalai pengarap.
“Nya alai, aku chukup temegah meda bala anak kitai taja agi biak tang sida chukup angkun ngemeranka budaya di menua tu,” ku iya.
Sama bisi datai iya nya Kaban Parlimen Betong, Dr Richard Rapu, Residen Betong, Richard Michael Abu Nawas, Pemesai Pelilih Betong, Alfred Geling Ason enggau ke bukai.-TVS
