SARATOK, 29 Jun: Bisi 70 iku raban polis ditu udah disikap ungkup nyaga pengelikun mensia mayuh sekumbang Pesta Saratok enggau Regata kalaka 2023.
Tuai Polis Pelilih (IPD) Saratok Deputi Superintendan Polis (DSP) Mordani Tanin madah, raban polis tu udah dibagi ngagai dua raban bejalaika tanggungpengawa sekumbang pengerami nya.
“Raban PDRM Saratok deka dibagi kami ngagai dua pengawa sepemanjai pengerami tu iya nya nyaga pengelikun ba sungai enggau ba darat.
“Kami mega udah ngerah urung 70 iku polis gawa maya nya ila nitihka SOP ti deka ditetap ngambika pengelikun mensia mayuh maya pengerami lebih tejamin,” ku iya maya dirandau TVS, apin lama ke udah.
Nangkan ke nya, Mordani bisi ngelalau mensia mayuh ke deka ngulu Pesta Saratok anang enda ngemeratka pengelikun diri lebih agi penguna jalai alun ke suah tama Simpang Saratok anang enda nitihka atur P-Turn ke betul laban jalai nya baru dibuka.
“Aku mega nesau deriba lori, treler ti ngetu ba simpang Saratok patut ngengkahka kereban pengangkut ba endur patut.
“Anang ngengkah kereban pengangkut ba tisi jalai laban nya tau meri penusah ngagai penguna jalai ke bukai,” ku iya.
Kelimpah ari nya, Mordani bisi madah sekeda jalai nuju ke panggau besai Pesta Saratok deka ditutup ungkup aktiviti bejualka barang.
Ungkup penemu, Pesta Saratok 2023 deka diatur pengelama sebulan sepanjai bulan Julai tu lalu pengujung pengerami tu deka ditampung enggau Regata Kalaka ti deka diatur 28 nyentuk 30 Julai.
Udah nya, nyerumba Hari Raya Aidiladha, Mordani bisi ngelalau mesia mayuh ke bisi mulaika diri kemisi ngagai menua tau madah ngagai balai polis ngambika kandang rumah sida ulih dipatau.-TVS
