BETONG, 26 Jun: Bala tuai parti politik Gabungan Parti Sarawak (GPS) lebih agi ba sitak Kunsil Nengeri (DUN) Bukit Saban dipinta bebendar agi gawa ke pemaik rayat.
Sapit Premier Sarawak Datuk Amar Douglas Uggah Embas madah, bala ketuai patut terus bekerejasama dikena nentuka rayat bela ngasaika pemansang ari bemacham program ke bisi disediaka perintah.
“Kitai anang enda bekerejasama taja diatu nadai sebarang isu dibantai (penyakal), tang ingat ‘Air Tenang Jangan Dijangka Tidak Ada Buaya’ (Ai Nadai Beriak, Anang Dikumbai Nadai Baya).
“Nya alai, bala tuai parti PBB, SUPP lebih agi bala PBB aku minta kita nentu semua kaban parti dijaga enggau ngasaika pemansang.
“Anang ditu bisi disebut tang pemansang nya nadai dipeda baka projek pegung ikan, program bantu indai beranak sepenyampau RM1,000 enggau mayuh agi ke bukai,” ku iya.
Uggah ke mega Kaban Kunsil Nengeri (ADUN) Bukit Saban madah munyi nya maya Pengerami Ngiling Bidai ke diatur ba ba Balai Raya Mensia Mayuh di Spaoh ditu, kemari.
Berebak enggau nya, ku uggah, iya udah ngasuh Sekretari Politik Ngagai Premier Sarawak, Roselind Mapong bejalaika tanggungpengawa ke patut dikena nentuka semua bantu seruran datai ba rayat.
“Nya alai, aku udah ngasuh Roselind Mapong ngatur semua macham bantu perintah ari perintah besai enggau perintah nengeri awakka datai ba rayat.
“Kitai nemu rayat semampai nyukung maya pengawa bepilih baka kitai ke bumai sida iya nyukung lalu endang ngarapka sama ampit beras ari umai ke dikereja kitai.
“Nya alai, aku minta saup bala tuai parti (renggat Pating, Indu enggau Nembiak) patut nentuka semua program datai ba rayat renggat baruh dikena ngelempungka tating belanja sida,” ku iya.-TVS
