BETONG, 25 Jun: Projek infrastruktur beungkus RM60.450 juta baruh Ejensi Pemansang Sitak Betong (BDDA) di Bukit Saban deka dipejalaika enda lama agi.
Sapit Premier Sarawak, Datuk Amar Douglas Uggah Embas madah, tu ngelai program BDDA ukai semina semaya perintah tang terus berengkah mungkur projek ngaga baru jalai kebun, makit enggau kandang jelu tupi baka sapi, kambin, manuk enggau jani.
“Projek iya ke disebut aku nya tadi iya nya projek baruh Ejensi Pemansang Sitak Betong (BDDA), udah lama berandau ke pekara tu.
“Nya alai, diatu baka buah udah mansau bisi deka dikemujur projek keterubah iya nya Projek Ngadu Jalai Kebun baka kebun getah, kebun sawit enggau kebun bukai ke sama diberi RM30 juta agih belanja ungkup Bukit Saban.
“Kedua iya nya Projek Ngaga Makit di Spaoh ditu laban enda chukup endur orang bejual nyadi makit ungkus iya udah diatur iya nya RM2 juta.
“Kami mega deka ngaga siti padang futsal di Spaoh beungkus RM450, 000 antara sekeda ari projek ke deka diatur deka digaga dlam dua tiga bulan tu.
“Nyadi, tu nunjuk ke program BDDA nya ukai semina semaya aja tang terus berengkah. Arap tu mujur laban genap DUN bela diberi RM200 juta,” ku iya.
Uggah ke mega Kaban Kunsil Nengeri (ADUN) Bukit Saban madah munyi nya ngagai raban media pengudah ngulu Pengerami Ngiling Bidai diatur Palan Servis Kaban Kunsil Nengeri Sitak N.37 Bukit Saban ba Balai Raya Mensia Mayuh, Spaoh ditu, pagi tadi.
Nangkan ke nya, ku Uggah semua pengari rayat ke bisi dalam BDDA deka baum minggu baru dikena ngatur rintai projek ngena agih RM100 juta agi.
“Nyadi minggu baru kami deka baum ngatur RM100 juta agi ungkup rintai projek ke patut digaga ba menua kitai (Betong) ditu.
“Nyadi infrastruktur nya sama deka diadu lengkas dikena mantu nyungkak penatai pemisi rayat ba menua tu,” ku iya.
Sama bisi datai ngulu pengerami nya Kaban Parlimen Betong, Dr Richard Rapu, Ex-Kaban Parlimen Betong, Datuk Robert Lawson Chuat, Residen Betong, Michael Abu Nawas, Pemesai Pelilih Betong, Alfred Geling Ason, bala Tuai Raban Bansa enggau ke bukai.
Berebak enggau nya, Uggah nesau mensia mayuh bela sampal datai ngulu Program Pengari Begulai Enggau Rayat di rumah panjai Samu di Spaoh kena 2 Julai tu ila lalu pengerami nya disadang deka digulu Sapit Menteri Besai Datuk Seri Ahmad Zahid Hamidi.-TVS
