SARATOK, 22 Jun: Urung 10,000 iku temuai disadang deka datai ngerichahka Pesta Saratok 2023 ke diatur sepanjai bulan julai tu ila.
Kaban Kunsil Nengeri (ADUN) Kalaka Mohd Duri madah, tu berindik ari penyampau perais chukup besai udah nganti Raja Sungai enggau mayuh bengkah program ke udah ditusun ungkup pengerami nya.
“Pesta Saratok deka diatur pengelama sebulan nyadi pengujung pengerami iya nya Regata Kalaka 2023.
“Nyadi kitai nyaran abis nadai 10,000 iku temuai datai laban kitai bisi nyendiaka perais ke chukup manah manggai RM15,000 ungkup gelar ‘Raja Sungai’.
“Aku ngasaia nya ulih tau matak penatai raban menijar tim kelimpah mayuh program ke udah ditusun. Kami udah baum lalu netapka pemutus sehari tu semua nya deka meri penguntung lebih agi ngagai komuniti ke diau besemak.
“Tu mega ngaul aktiviti main enggau luma ungkup raban nembiak lalu mayuh mega aktiviti udah dirintai dikena nangkup peminta peminta lumba nyadi aku ngasai taun tu penatai temuai deka lebih mayuh,’ku iya.
Iya madah munyi nya pengudah ngulu aum kepenudi Komiti Pengatur Pesta Saratok ba Bilik Aum Opis Pelilih Saratok ditu, kemari.
Berebak enggau nya, Mohd Duri ngelalau mensia mayuh ke bela gagit enggau ngerichahka pengerami nya terus ngemeratka pengelikun diri empu enggau keresa sida ke tinggal maya ngulu pengerami.
“Kitai ngarapka mensia mayuh ke diau besemak enggau Pelilih Saratok sampal datai enggau ngerichahka pengerami tu.
“Berebak enggau nya, aku mesan semua kita anang enda ngemeratka pengelikun diri empu, reta tengkira kita baka rumah lebuh kita nurun deka ngemataka pengerami.
“Maya deriba ba jalai alun mega anang enda bejimat, taja gagit enggau berami tang pengelikun enda tau enda dijaga,” ku iya.
Ungkup penemu , Pesta Saratok 2023 deka diatur sepanjai bulan julai lalu ditampung enggau Regata Kalaka 2023 ke bela deka nyendiaka perais sepenyampau RM15,000 ungkup pemenang gelar Raja Sungai. Pengerami tu ditaga diatur berengkah 28 nyentuk 30 Julai tu ila.
Komiti pengatur pengerami mega bisi ngangauka penanyi tebilang ari Semenanjung Naqiu Boboy enggau penanyi tebilang menua tu Melissa Francis ungkup merindang mensia mayuh.-TVS
