BETONG, 22 Jun: Langgur penemu deka ngemasukka program Niti Daun enggau Bazar Gawai dalam kalinda dagang temuai menua patut disukung semua raban ngambika terus ngangkatka adat, budaya sereta pemakai asal Dayak.
Kaban Kunsil Nengeri (ADUN) Krian Friday Belik madah iya meri sukung penuh ngagai perambu nya laban pengawa nya deka mantu nyungkak sektor dagang temuai enggau sektor dagang di nengeri tu.
“Aku sigi setuju enggau meri sukung penuh ngagai penemu dibantaika Sapit Premier Sarawak Datuk Amar (Douglas Uggah Embas) laban nya ari program nya deka meri awak ngagai kitai di Sarawak ditu lebih agi kitai Dayak ngayanka pemakai asal kitai.
“Kelimpah ari nya lalu meri awak tauka peluang ngagai raban (pedagang) ti deka nguji peluang enggau orang bedagang lebih agi bejual pemakai lebuh maya Bazar Gawai tu diaduka tiap-tiap taun,ku iya.
Friday mansutka timbal nya maya meri timbal senentang perambu ngemasukka program Niti Daun enggau Bazar Gawai dalam kalinda dagang temuai menua sepengudah tembu ngulu sebengkah aum ke diatur ba Opis Residen Betong, kilah ensana.
Nangkan ke nya, ku Friday ba sukut rama program Niti Daun enggau Bazar Gawai tu ulih dikena perintah ngangkatka agi adat, budaya enggau pemanah pekayan asal bansa Dayak.
“Pengawa Niti Daun ke baru udah diatur ba menua Kuching (api lama ke udah) diperati siti chara ke ulih dikena kitai ngangkat ke agi budaya kitai Iban ari segi pekayan.
“Kebuah pia laban mensia ke datai maya nya endang iya bekenaka ngepan asal diri baik nya bansa Iban, Bidayuh tauka Orang Ulu sama bela bekena ke ngepan asal diri empu.
“Pengawa tu mega diperati manah laban dikena kitai ngelakuka pekayan bansa kitai Dayak awak ke ditemu menua bukai,” ku iya.
Kelimpah ari nya, ku Friday enti diperati ari sukut ekonomi dia program Niti Daun enggau Bazar Gawai tu jemah deka mantu ngelakuka pemakai asal bansa dayak.
“Ari sukut ekonomi iya tau nyungkak penatai pemisi raban ke ngemeran ke pengawa ngaga baju betenun Baju Burung ngaga Gagung laban nya siti ari utai ke pemadu dikerindu orang diatu.
“Nya alai, dudi hari kitai ngarapka nengah program ke baka tu sida ke bedagang patut ransing agi ngasilka produk ke lebih bekualiti dikena ngerembaika dagang sida,” ku iya.
Ungkup penemu, sebedau tu Sapit Premier Sarawak Datuk Amar Douglas Uggah Embas bisi mansutka langgur penemu deka ngatur randau enggau menteri dagang temuai ba renggat Perintah Besai enggau Sarawak bekaul enggau perambu ngemasukka program Niti Daun enggau Bazar Gawai dalam kalinda dagang temuai menua.-TVS
