KUCHING, 15 Jun: Tetiap buah rumah panjai di menua pesisir sigi patut numbuhka librari mit dikena meransang anak lebih agi nembiak sekula rindu macha bup.
Menteri ba Opis Premier Sarawak Datuk John Sikie Tayai madahka iya nyukung perambu Sapit Premier Sarawak, Datuk Amar Douglas Uggah Embas ti merambu librari mit ditumbuhka di rumah panjai.
Ku iya madah, bidang pelajar iya nya pekara ti pemadu beguna sereta patut diberi perati bala apai indai lebih agi pemandai nguasa Jaku English.
Nya kebuah, Komiti Pengelikun enggau Pemansang Genturung Pendiau (JKKK) ba rumah panjai patut numbuhka komiti pelajar dikena matau pemansang pelajar nembiak.
“Kitai suah meda nembiak enti pulai ke rumah rindu agi meda TV enggau megai telefon pintar.
“Nya kebuah JKKK rumah panjai mesti bisi komiti tauka biro pelajar ti ngemataka pelajar nembiak, ukai semina biro bukai aja ditumbuhka,” ku iya madah rambau dirandau pemberita TVS empai lama.
Nangkan ke nya, John Sikie ke mega Kaban Kunsil Nengeri (ADUN) Kakus nerangka tetiap iku pengari rayat mega ulih ngungkupka turu ba baruh Projek Mit Menua Pesisir (MRP) ngagai JKKK rumah panjai dikena meli bup ngambika ulih dibacha nembiak tebal agi bup ti nguna Jaku English.
“Ulah rindu macha bup nyau majak kurang dikemeratka apai indai berindik ari nembiak nyau rindang nguna telefon pintar.
“Ambika chunto, ba kedai kupi bisi orang enda berandau enggau pangan diri, lebuh makai bala anak nyau bepedaka cherita katun lalu ulah baka tu ulih ngurangka pengerindu anak deka macha,” tandu iya.
Nya alai, librari mit ti ditumbuhka ba rumah panjai tau matak pengerindu nembiak macha bup maya lepa enggau nyeliahka sida ngereja pengawa ke enda manah.
Iya mega minta apai indai meransang anak sida macha bup awakka sida ulih nambahka penemu diri dalam pekara pelajar sereta anang lembau betanya enggau bala pengajar. – TVS
