SARATOK, 15 Jun: Kaban Kunsil Nengeri (ADUN) Krian, Friday Belik muji inisiatif Menteri Besai ke udah setuju ngemendarka agih belanja sepenyampau RM10 juta dikena neruska pengawa nyukat Tanah Hak Adat Bumiputera (NCR) di nengeri tu.
Ku Friday, rayat Sarawak lebih agi komuniti Dayak patut beterima kasih ke pemutus ke udah digaga Menteri Besai, Datuk Seri Anwar Ibrahim laban nengah agih belanja nya ngarapka pengawa nyukat tanah NCR lebih lengkas tembu.
“Nyadi utai ke dibantaika Menteri Besai (Datuk Seri Anwar Ibrahim) nya siti utai ke manah laban nya sekurang-kurang iya ulih nulung kitai di menua Sarawak ditu neruska inisiatif nyukat Tanah NCR kitai.
“Kitai sama nemu agih belanja ungkup pengawa pengawa nyukat tanah NCR ari perintah besai udah dikurangka kenyau ari taun 2018.
“Nya alai, belabuh ari taun tu agih nya udah bisi lalu arapka proses nyukat tanah NCR tu jampat agi tembu,” ku iya.
Iya mansutka penemu nya ngagai pemberita pengudah bejadika Projek Bekal Ai Bukit Graviti ba Rumah Jimmy Brayang, kemari.
Nangkan ke nya, ku Friday agih belanja ke dikemendarka Menteri Besai nya sempama baka ‘perais Gawai’ laban berita manah nya dibantai nyerumba bulan Gawai Dayak.
Ungkup penemu, Menteri Besai Datuk Seri Anwar Ibrahim ngemendarka agih belanja sepenyampau RM10 juta nya ari Perintah Besai dikena nyukat tanah NCR di Sarawak rambau Pengerami Gawai Dayak 2023 ke diatur ba Palan Aum Borneo Kuching (BCCK) kena 7 June tu tadi.
Pemesai bungkur tanah NCR di Sarawak dipelabaka manggai 1.5 juta hektar lalu ari penyampau nya semina 1.1 juta hektar udah tembu disukat.-TVS
