KUCHING, 12 Jun: Ekonomi tegap ke diasai rayat Sarawak diatu asil ari pengelantang enggau pemanah penyerakup pupu bansa di menua tu.
Premier Sarawak, Datuk Patinggi Tan Sri Abang Johari Tun Openg madah, kaul rat entara rayat pupu bansa di nengeri tu udah matak perati enggau nyadi chunto ngagai rayat nengeri bukai.
“Taun tu, pengerami Hari Gawai chukup nyelai laban rambai jaku Segulai Sejalai udah narit ati Menteri Besai lalu konsep tu deka diguna di serata Malaysia.
“Ukai semina kelai basa ngagai komuniti Dayak tang ngagai Sarawak laban perintah ba renggat perintah besai deka ngangkatka konsep nya,” ku iya.
Iya mansutka jaku nya rambau Pengerami Ngelaluka Pengabang Gawai Opis Premier Sarawak di Kompleks Kunsil Nengeri (DUN), pagi tadi.
Sama bisi datai iya nya Sapit Premier Sarawak, Datuk Amar Douglas Uggah Embas, Datuk Amar Awang Tengah Ali Hasan enggau Dato Sri Dr Sim Kui Hian, Sekretari Perintah Sarawak Datuk Amar Mohamad Abu Bakar Marzuki enggau Sapit Sekretari Perintah Sarawak (Adminstrasyen) ke mega Chairman Komiti Pengerami Gawai Dayak 2023 Datu Buckland Bangik.
Iya nerang, perintah penyerakup dekaka sebuah menua ti likun ungkup pemansang menua ngambika Malaysia nyadi lebih kompetitif ba renggat antarabansa.
Beduduk enggau nya, Abang Johari ngarap kerejasama entara pengereja pengawa perintah enggau perintah nengeri tetap teguh dikena ngemujurka juluk sarawak nyadi sebuah nengeri maju manggai taun 2023.-TVS
