BETONG, 12 Jun: Sapit Premier Sarawak, Datuk Douglas Uggah Embas meransang semua nembiak sekula primari lebih agi ba sitak bukit saban mesti bebendar nguasa subjek English laban nya jaku entarabansa.
Ku iya, pengelandik bejaku English chukup beguna laban ari pengelandik nya sida deka muntang belajarka mayuh bidang pelajar ke bukai baka Sains enggau Matematik.
“Ungkup kami ba Bukit Saban, tuju tauka juluk besai kami iya nya ngemanah agi perengkaguna pelajar ungkup bala anak uchu ichit kitai.
“Nya kebuah, aku minta bala pengajar berengkah enggau SK St John Nanga Tiga ditu endur kitai ngansah, ngambuh, nyepuh sida (nembiak) awakka landik nulis enggau macha dalam jaku English.
“Enti sida udah apus Primari 6, ari pengelandik bejaku English nya tadi tentu sida senang nguasa subjek Matematik,” ku iya.
Uggah ke mega Kaban Kunsil Nengeri (ADUN) Bukit Saban madah munyi nya rambau Program Outreach High Immersive Programme (HIP) diatur Sekula Primari (SK) Saint John Nanga Tiga ba Rumah Jabin Bagilie di Tembawai Tinting Ulu Layar, apin lama ke udah.
Berebak enggau nya, ku Uggah perintah Sarawak mega udah nyadi ke chunto ngagai perintah besai ketegal ngemeran ke jaku English.
“Di Sarawak kitai patut bebendar ngaga latih dalam jaku English laban nya jaku antarabansa.
“Jaku tu mayuh dikena ba pengawa dagang enggau semua tikas pengidup lebih agi enti sida deka belajarka penemu Teknologi Sains. Nya alai, jaku English tu chukup beguna amat.
“Diatu kitai benung belatih, tambah mega Menteri Pelajar kala nyebut iya deka terus ngemeranka pelajar STEM (Sains Teknolgi Injiniring enggau Matematik).
“Nya alai, aku minta Kepala Pengajar nguna program ke diatur tu dikena ngansah enggau ngambuh bala nembiak landik bejaku English dikena sida nangkup pelajar ba Pom Satu tauka ngagai tikas lebih tinggi,” ku iya.
Ba program ke sama, Uggah bisi ngungkupka belanja sepenyampau RM10, 000 dikena Sekula Primari (SK) Saint John Nanga Tiga meli kereban bacha bala nembiak kelimpah ngagihka RM100,000 agi dikena neriki padang sekula nya.-TVS
