LUNDU, 11 Jun: Perengkaguna mantu raban orang timpang pendiau (OKU) lebih agi ba dalam begunan ba Malaysia diperati agi mimit.
Menteri Pemansang Indu, Ruang Bilik enggau Komuniti Datuk Seri Nancy Shukri madah, randau begulai enggau opis menteri bukai sereta pengawa meresa polisi OKU di menua luar deka digaga dikena nentuka perengkaguna mantu oku di menua tu ulih ditambah mayuh agi.
“Seninjik bendar aku deka nurun ke Amerika Syarikat berandau lalu deka baum pasal orang timpang pendiau lalu kitai deka meda enggau mending baka ni atur dititih ba menua luar.
“Polisi-polisi ke dikena sida sekalika polisi nya engkeman enggau utai ke ulih digaga sereta ubah.
“Laban dedin ila kitai deka bekunsika polisi kitai enggau mega ari sukut kategori ke baka ni ke dikumbai OKU tu, kitai deka magi nya nitihka chara Malaysia.
“Tu ukai pilih menua bukai laban menua bukai pan sida pilih (kategori) ke enda sama. Nyadi tu deka dikerandau aku enggau raban bekaul ba renggat Serakup Bansa ila,” ku iya.
Nancy madah isu begunan mantu oku lebih agi ba di Kuala Lumpur mega bisi dikenang lebuh iya berandau enggau Kaban Kaunsil Menua Senator Isaiah Jacob lebuh Hari Lima.
Asil ari randau nya, Isaiah ti ngarika raban OKU madah raban sida udah numbuhka siti komiti dikena meresa begunan-begunan ba Kuala Lumpur ngambi ulih nyendiaka perengkaguna ungkup pengelantang raban OKU. -TVS
