BINTULU, 11 Jun: Datuk Patinggi Tan Sri Abang Johari Tun Openg madah, pemintar bepolitik ti dikemeranka rayat Sarawak ngujungka sida nyadi kering enggau terus negika hak enggau lebih ngasi.
Iya ke mega Chairman Gabungan Parti Sarawak (GPS) madah, sida mega patut bepolitik enggau niat ke betul lalu bekerejasama enggau sebarang parti ti nyamin pengelantang rayat Sarawak dudi hari.
“Lebuh kitai beserakup, udah tentu ‘tiang rumah’ kitai tegap, enti enda pia (tentu) runtuh rumah kitai,” ku iya.
Iya madah munyi nya maya bejadika Aum Besai Tiga Taun Sekali Parti Demokratik Progresif (PDP) 2023 ditu, pagi tadi.
Bela datai Sekretari Besai GPS, Datuk Seri Alexander Nanta Linggi enggau Presiden PDP, Datuk Seri Tiong King Sing.
Abang Johari ke mega Premier Sarawak madah, rayat enda patut nyanda pemedis nyengkaum pambar laban nya deka ngeruga penegap ke diasai Sarawak kelimpah tau ngeruga pemansang ke benung digaga diatu.
“(Pengawa) ngaga nya ukai muntang (laban betapi enggau bemacham pemar endur) kitai ngemansangka Sarawak nyentuk 60 taun.
“Nya alai, kitai deka ngetanka pekara ke udah dijapai lalu terus ngemansangka nengeri kitai tu,” ku iya.
Berebak enggau nya, Abang Johari madah, atur numbuhka GPS endang pemutus ke engkeman laban iya nyadi pelasar ngagai ketuai enggau rayat Sarawak negika pengelantang pengidup sida dudi hari.
“(Tu nyengkaum) mulaika baru hak ke udah lenyau baka ke udah ditanggam dalam Sempekat Malaysia 1963 (MA63),” ku iya.
Nangkan ke nya, Abang Johari mega nandu juluk iya enggau bala bakih dalam GPS deka terus ngemansangka Sarawak enggau ngangkatka ekonomi nengeri.
“GPS udah tentu ngembuan polisi ke nyemetak dikena ngangkatka ekonomi Sarawak enggau mulaika baru ngagai rayat Sarawak nengah pemansang.
“Udah nyadi juluk GPS, nyema status wang nengeri tu manah, kitai merambu nyendiaka pelajar tinggi pechuma ngagai genap anak Sarawak ti nampung pelajar ba universiti di Sarawak,” ku iya.
Abang Johari madah, rikod ngatur ekonomi Sarawak mega mandangka rikod ti manah ba taun tu.
“Ungkup suku keterubah 2023, kitai tegumpulka sepenyampau RM5 bilion.
“Udah tentu deka lebih (asil) tang anang kitai semina terus nguna laban patut disimpan.
“Nya alai, kitai numbuhka Turu Pesaka Bansa. ‘Insya- Allah’ deka berengkah taun baru ungkup pengidup anak Sarawak,” ku iya. -TVS
