BETONG, 10 Jun: Agih belanja sepenyampau RM100, 000 udah dikemendar dikena neriki padang Sekula Primari (SK) Saint John Nanga Tiga ditu.
Sapit Premier Sarawak, Datuk Amar Douglas Uggah Embas madah ke padang sekula nya endang patut diteriki laban semua sekula endang patut ngembuan perengka guna lumba ti manah.
“Nyadi tadi Kepala Pengajar bisi ngenang sekeda penyuntuk ba sekula sida iya nyadi aku tadi udah ngemendarka belanja RM100,000 dikena neriki padang sekula sida.
“Udah nya ba senentang agu kami agi berunding baru lalu baka rumah-rumah Pengajar nya aku deka ngasuh sida meri ripot penuh laban endang tuju kitai deka nentu ke semua perengkaguna rumah lumba, padang sekula nya digaga enggau manah agi.
“Diatu ni bagi sekula ke apin diberi perintah perengkaguna ke chukup enda tau enda diberi perati,” ku iya.
Uggah ke mega Kaban Kunsil Nengeri (ADUN) Bukit Saban madah munyi nya pengudah bejadi ke Outreach High Immersive Programme (HIP) diatur Sekula Primari (SK) Saint John Nanga Tiga ba Rumah Jabin Tembawai Tinting, Ulu Layar ditu, kemari.
Kelimpah ari nya ku Uggah madah, sekeda agih belanja ari Agensi Pemansang Sitak Betong (BDDA) mega deka diguna dikena neriki perengkaguna ba genap sekula ba sitak DUN Bukit Saban ngambi nyadi peransang ngagai bala nembiak enggau pengajar.
“Ba Bukit Saban kitai udah bisi Agensi Pemansang Sitak Betong (BDDA).
“Nyadi sebagi ari belanja nya mih patut dikena ngemanah ke rumah pengajar neriki padang enggau sebarang perengka ke diguna nembiak besekula dia.
“Pekara ke apin chukup iya nya ari sukut perengkaguna. Enti perengkaguna nya udah bisi tentu iya deka nyadi peransang ngagai bala pengajar enggau nembiak ke besekula dia.
“Kitai mega endang ngarapka anak uchu ichit kitai dia bulih pemandai. Sekula primari endang pekara pemun ke pemadu beguna endur ngelatih sida nyingkang ke mua.
“Enti sida disediaka perengkaguna ke menyana nya tentu deka meri empas ke manah ngagai sida dudi hari,” ku iya.
Ungkup penerang, SK Saint John Nanga Tiga ditumbuh taun 1962 lalu diatu sekula nya bisi 144 iku nembiak, 16 iku pengajar sereta tujuh iku staf pemantu sekula.-TVS
