MIRI, 10 Jun: Premier Sarawak, Datuk Patinggi Tan Sri Abang Johari Tun Openg sehari tu bisi nguluka program Konvoi Kembara Sarawak Merdeka mungkur pejalai ke Bintulu kelimpah sangkai ba Pantai Bungai ditu.
Pejalai raban konvoi neresa penyauh 47.3 kilometer (km) berengkah ari Stadium Tertutup Miri pukul 10.40 pagi seraya dirami peranak ke diau besemak nyengkaum bala nembiak sekula.
Rambau sangkai ba palan ke dituju, Abang Johari bisi dibai ngemujurka Adat Nyiam Batis (masu kaki) enggau Beras Kuning sebedau diperindang raban ari Sadaman iya nya sida ari Palan Aktiviti Orang Tuai (PAWE) Sibuti kelai ngelaluka penatai sida.
Premier Sarawak udah nya bisi berandau enggau mensia mayuh sebedau begulai ngirup enggau raban temuai dipebasa bala Tuai Raban Bansa enggau Tuai Rumah (KMKK).
Nangkan ke nya, mensia mayuh diperindang raban koir aro nembiak Sekula Sekondari (SMK) Bekenu enggau ngemataka pengawa nebah gendang.
Nitihka penerang ari Unit Komunikasyen Perintah Sarawak (UKAS), Abang Johari bisi madahka pemeri sepenyampau RM10,000 ngagai Gerempung Apai Indai enggau Pengajar  (PIBG) SMK Bekenu berindik ari gaga ke pemanah pemutus peresa Sijil Pelajaran Malaysia (SPM) 2022 sekula nya.
Udah nya, Abang Johari enggau raban konvoi bekejang nuju Kampung Nyalau, Bintulu sereta sangkai ba endur nya urung pukul 11.55 pagi. – TVS
