KUCHING, 9 Jun: Perintah Sarawak terus mekuhka pengawa matak pemeranak puku ari menua luar ngambika milih nengeri tu nyadi palan tauka endur bejalaika operasyen ngaga solar.
Sapit Premier Sarawak, Datuk Amar Awang Tengah Ali Hasan madahka, naka ke diatu sida udah bedajaka Sarawak nyadi endur ngeluarka solar pengudah betemu enggau serikat pengeluar solar di pelilih Joo-Hai, China.
Serikat nya ngembuan bungkur produk ke besai ti ngaul genturung pendiau, komersial sereta industri.
Nengah sebengkah penerang kemari, Awang Tengah ke mega Menteri Dagang Antarabansa, Industri Enggau Meranak Puku Sarawak nerangka, serikat nya bisi langgur deka ngerembaika dagang sida di menua luar.
Nya siti chara dikena nampung peminta ke majak nambah ba makit global.
“Tuju pengawa betemu tu diatur dikena bedajaka Sarawak nyadi endur ngeluarka solar laban Sarawak bisi ekosistem ti ditumbuhka ba Sama Jaya enggau Samalaju.”
“Sarawak mega entara endur ti strategik alai pemeranak puku ngerembaika makit ba renggat global,”ku iya.
Nangkan ke nya, iya madahka, pengawa ejalaika projek nya endang seriris enggau Strategi Pemansang Pasca Covid-19 (PCDS) 2030 Sarawak ti bepelasarka guna data enggau teknologi.
Pemesai bukai ke bisi ngulu pengawa betemu nya, Sapit Menteri Dagang Antarabansa enggau Meranak Puku, Datuk Dr Malcolm Mussen Lamoh sereta Penyanding Penemu Opis Menteri Dagang Antarabansa, Industri enggau Meranak Puku (MINTRED), Datuk Mohd Naroden Majais.-TVS
