KUCHING, 8 Jun: Perintah Sarawak komited ngangkatka tikas pengidup komuniti Dayak, ku Premier Sarawak, Datuk Patinggi Tan Sri Abang Johari Tun Openg.
Beduduk ari nya, iya ngansak komuniti Dayak terus nyaran ngagai pengawa pelajar laban nya kunchi pemujur dikena ngubah pengidup sida awak seikas enggau komuniti bukai.
Kelimpah ari nya, iya minta komuniti nguna manah enggau ngemansangka tanah sida laban nya ulih meri untung ke besai nyungkak ekonomi.
“Siti pekara ke patut kitai aku iya nya Dayak bisi tanah, lalu kita patut ngemansangka tanah nya ngena teknologi, kitai mega ngarapka pekara pelajar dikemerat laban semina nengah pemandai sekula aja ulih ngubah pengidup kitai enggau pendiau ke lebih menyana dudi hari.
“Kitai diberekat laban bisi reta baka tanah, nyadi kena mih reta nya dikena nambahka pengeraja (pengawa komersial) bukai ungkup komuniti Dayak.
“Tabi puji ngagai komuniti Dayak laban ulih bekerejasama enggau kami (perintah nengeri) lalu tentu kami ngembuan atur dikena ngangkatka komuniti Dayak baka komuniti lain. Nama aja penatai pemisi ke dikembuan kami, kami deka mulaika nya baru ngagai,” ku iya.
Abang Johari madah munyi nya maya bejaku ba Pengerami Gawai Dayak 2023 diatur ba Palan Aum Borneo Kuching (BCCK) ditu, malam tadi.
Udah nya, ngelansa pasal pengerami malam nya, Abang Johari ngasaika nya sebagi ari budaya ke bisi ba Bumi Kenyalang sereta patut dijaga rayat di nengeri tu lebih agi raban komuniti Dayak.
“Taja pan ari sukut penatai asal, adat enggau pengarap ti bebida, tang kitai ngembuan konsep ke sama, ‘getil kanan, kiba pedis, getil kiba, kanan pedis’.
“Tu mih Sarawak, negu siku reti nya negu semua orang, reti nya kitai deka ngetan diri ungkup pemaik Sarawak dudi hari,” ku iya.
Ungkup rikod bisi 1,800 temuai ngerichahka pengerami Gawai Dayak 2023 malam nya ke bela diperindang sekeda raban penanyi tebilang menua tu.
Sekeda ari pengawa pemerindang ke matai ati bala temuai iya nya tebah ‘Gendang Pampat’; beperindang enggau artis menua tu baka Ricky El, Melissa Francis, Rozzie Mila, enggau Eddie Kuwing; ditangkan sampi ‘Biau Pengabang’ ari Tuai :atih, Pengatur Kualiti enggau Pansik Unit Komunikasyen Perintah Sarawak (Ukas), Dr. Charlie Dundang.
Pengerami nya mega bisi ngayanka pengawa bejalai beraban ngena ngepan asal lelaki enggau indu ari raban komuniti etnik Sarawak.
Pengujung pengerami nya dia Tuai Pemegai Menua (TYT) Sarawak Tun Pehin Sri Abdul Taib Mahmud enggau bini iya, Toh Puan Datuk Patinggi Raghad Kurdi Taib ngiring pengawa ‘Nyeradak Ai Pengayu’ begulai enggau bala pemesai ke bukai.
Sama bisi ngemujurka kelai pengerami nya Menteri Besai Datuk Seri Anwar Ibrahim, Sapit Menteri Besai Datuk Seri Fadillah Yusof, Abang Johari enggau bini iya, Datuk Amar Juma’ani Tuanku Bujang, Speaker DUN Tan Sri Datuk Amar Mohd Asfia Awang Nassar, Sapit Premier Sarawak Datuk Amar Douglas Uggah Embas enggau bini iya, Datin Amar Doreen Mayang sereta ke bukai. -TVS
