KUCHING, 5 Jun: Presiden Parti Sa’ati Rayat Sarawak, (SUPP), Dato Sri Dr Sim Kui Hian meransang rayat Sarawak bela ngerebut peluang ke disedia nengah Strategi Pemansang Pasca COVID-19, tauka PCDS 2030 ngambika sama bulih pemaik ari nya.
“Ungkup PCDS 2030 kitai mesti nemu kuing tuju perintah ti begunaka semua rayat patut sejalai enggau perintah.
“Perintah begunaka kita (rayat) ti bisi penau lalu perintah mega begunaka kita ngerebut peluang laban peluang endang bisi disedia ungkup kita lebih agi ke nyadi anak Sarawak.
“Nya alai, kita mesti ngambi peluang nya, awakka kita ulih nampung iya nyapai juluk ba taun 2030.
“Kitai deka meda ukai semina maju ari sukut ekonomi sereta penau tang inklusif.
Perintah ukai semina deka nyaga meruan ba rampa menua tang kitai mega deka ngembuan anak Sarawak ke ulih dikemegah enggau ketegal pemanah polisi,” ku iya
Dato Sri Dr Sim Kui Hian ke mega Sapit Premier Sarawak madah munyi nya maya bejaku ba pengerami nuatka tambai nyerumba Pengerami Ngintu Taun Penumbuh SUPP ke-64, pagi kemari.
Nya alai, iya ngarapka rayat sarawak ulih meretika kuing tuju perintah sarawak, lalu ngerebut peluang ke bisi disedia kelimpah mantu ngemansangka sarawak udah tu.
”Majoriti rayat Sarawak diatu nengkila aja, nama kebuah? Laban kitai udah kelalu maju kini, tauka rayat bedau ulih nitih?
“Nyadi nuju semua rebak baru ba Sarawak, uji ambi bidang nya, masuk bidang Sains, ngambi kita ulih nyadi sebagi ari orang ti ngemeratka Sarawak ba dunya, awakka kita ulih besaup enggau kami (perintah),”ku iya.
Beduduk ari nya, iya ngarapka rayat Sarawak patut ngubah runding, neleba diri enggau pemansang Sarawak seraya ngaga ubah sereta ngulihka pemaik ari transformasyen perintah Sarawak.
Iya ngasaika nyema Sarawak terus mansang dia rayat deka terus ngasaika pemaik, pengelantang lalu pengujung iya Sarawak deka lebih pegari ba mata dunya.-TVS
