BINTULU, 5 Jun: Menteri Ba Opis Menteri Besai (Nyaga Pekara Sabah, Sarawak enggau Pengawa Khas) Datuk Wilson Ugak Kumbong madahka perambu minta kemisi hari gawai kena 1 june ungkup serata menua patut dibantaika ba kabinet.
Ku iya madah, pengawa ngaku Hari Gawai nyadi kemisi ba serata menua di Malaysia deka mandangka kelai basa ngagai semua bansa Dayak di menua tu.
“Enti pengawa nya ulih dikemujur iya deka meri empas ke manah iya nya meri pemereti ati lebih agi ngagai rayat di Semenanjung senentang budaya bansa Dayak.
“Tu deka nyadi kelai basa ngagai semua bansa Dayak.
“Enti Gawai Dayak tu ulih diberi nyadi hari kemisi ba serata menua, nyadi semua rayat dalam Perintah Madani deka ulih sama ulih berami (ngintu Hari Gawai).
“Kebuah pia laban bisi bansa Dayak ke diau di Semenanjung nyangka enda ulih pulai ke menua ngintu pengerami nya, nyadi sida ulih berami enggau kaban belayan enggau bansa bukai baka bansa Melayu di Semenanjung,” ku iya.
Ugak ke mega Kaban Parlimen Hulu Rajang mansutka penemu nya lebuh dirandau pemberita ba Pengerami Rumah Tebuka Hari Gawai diatur ba rumah iya empu di Pearl Garden, kemari.
Pengerami rumah tebuka tu bela bisi digulu Premier Sarawak Datuk Patinggi Tan Sri Abang Johari Tun Openg sereta bala kaban kabinet perintah nengeri.
Nya alai, Ugak ngarapka ngarapka Menteri Besai Datuk Seri Anwar Ibrahim ulih berundingka senentang perambu nya seriran enggau konsep Perintah Malaysia Madani ti ngemeratka semua bansa.-TVS
