KUALA LUMPUR, 5 Jun: Yang Di-Pertuan Agong Abdullah Ri-Ayatuddin Al-Mustafa Billah Shah ngelalau semua rayat Malaysia anang nyadika isu pengarap nyadi petalat enggau charutka politik.
Ku iya, semua raban patut bebasaka pengarap Islam nyadi pengarap rasmi menua Malaysia baka ke udah ditetapka dalam Pekara 3 Kunstitusyen Perintah Besai sereta mega bebasaka penuduk Raja-Raja Melayu ti nyadi tuai pengarap Islam.
“Taja pia, pengarap ke bukai agi ulih dikemeranka enggau lantang.
“Semangat ulih bebatak asur entara rayat pupu bansa di Malaysia ke bendar iya nya meri empas ke chukup manah ngagai menua.
“Nya alai, dikena numbuhka sebuah menua ti tegap, mansang, dibasa enggau beintegriti, kitai semua mesti muai agenda retorik ti deka ngeruga penyerakup tang kitai patut beserakup ngemansangka menua nuju ke pengidup le lebih manah dudi hari,” ku iya.
Al-Sultan Abdullah mansutka penemu nya beserimbai Pengerami Ngintu Hari Pengada Rasmi Seri Paduka Baginda ti dipancharka terus nengah televisyen menua tu, malam tadi.
Berebak enggau nya, Agong meri terima kasih ngagai Tuhan laban taun tu iya nya taun ti kelima ungkup iya enggau Raja Permaisuri Agong Tunku Hajah Azizah Amainah Maimunah Iskandariah ngintu Hari Pengada Rasmi begulai sama enggau rayat Malaysia.
Seri Paduka dipadu nyadi Yang Di-Pertuan Agong Ke-16 kena 30 Julai 2019.
Al-Sultan Abdullah mega beterima kasih laban Hari Pengada Rasmi iya diintu dalam pendiau menua ti likun sereta lantang.
“Ba taun tu tadi, Pengawa Bepilih Besai ti ke-15 enggau proses numbuhka Perintah Besai udah dipejalaika enggau lanchar lalu dalam gaya menua ti likun enggau lantang.
“Tu mih bukti ti nyata sentang atur ngemeranka demokrasi ti dikemeranka kenyau tujuh dekad ti udah agi mengkang ditan di menua tu.
“Atur ngemeranka demokrasi tu patut terus dijadika pemun ngagai penegap enggau penyerakup menua,”ku iya.
Agong mega madah, Malaysia ngembuan potensi ti besai nyadi menua ti maju enggau diangkun, laban menua tu endang likun, bisi mayuh macham puncha enggau modal mensia ti bekualiti sereta ngembuan semangat juang ti tinggi.
Ku iya, pengering besai menua tu iya nya rayat iya ti endang siruka pengelikun, pengelantang enggau penyerakup dalam pengidup besehari-sehari sereta nerima pupu bansa enggau penuh lantang.
Agong madahka rayat Malaysia mega udah lama mujur nempa nama di mata dunya dalam mayuh bengkah bidang nyengkaum nempa landskap geopolitik serantau enggau global.
Kelimpah ari nya, Al-Sultan Abdullah enggau Raja Permaisuri Agong mega meri terima kasih ba jaku puji, lalau enggau sampi ti udah diberi ngagai iya ti nyadi pengering ngagai iya deka terus ngembing sereta ngiring rayat Malaysia enggau adil.
Ba pengujung jaku, Yang Di-Pertuan Agong meri terima kasih ngagai perintah, raban pengatur, pengereja pengawa perintah enggau raban tim pengelikun ti udah mantu nyaga pengelikun enggau pengelantang menua.
“Aku deka mai raban tuai menua ngambika terus kereja enggau ati ti lurus, lalu ngangkat manah atur deka numbuhka sistem ngatur menua ti lebih sikar, gauk ke rayat enggau beintegriti ungkup pemaik pengidup rayat enggau menua dudi hari,”ku iya.
Agong mega meransang semua rayat malaysia besampi ngambika menua terus mengkang likun enggau lantang sereta jauh ari semua penusah enggau penanggul ti ulih ngeruga menua.-TVS
