PUSA, 4 Jun: Sapit Premier Sarawak, Datuk Amar Douglas Uggah madahka semua projek ke suah dipadahka ngelama tu ukai semina janji aja, tang sekeda bisi udah tembu sereta bisi mega benung dipejalaika.
Ku iya madah, Perintah Sarawak ba baruh iring Premier Sarawak Datuk Patinggi Tan Sri Abang Johari Tun Openg endang chakah mai ubah pemansang seriran enggau penatai pemisi Sarawak ke majak nambah ninting taun nengah mayuh bengkah bidang ekonomi baru ke ditumbuhka.
“Kitai di Saribas bisi siti jematan ke udah tembu, dua buah agi jematan deka digaga iya nya jematan Batang Saribas 1 beungkus RM375 juta.
“Udah nya, ke ili agi ngagai menu Sepinang, dia Jematan Batang Saribas 2 beungkus RM385 juta mega deka digaga ngembuan pemanjai 2.39 kilometer.
“Pia mega, ba sitak Batang Lupar bisi sebuah jematan ke ngembuan pemanjai 4.88 kilometer beungkus RM850 juta benung chakah digaga,” ku iya tu nyengkaum projek ngagai jalai raya ke menua pesisir.
Iya mansutka penerang nya rambau Pengerami Rumah Tebuka Gawai Raya Parlimen Batang Lupar, Kemari.
Uggah ke mega Menteri Infrastruktur enggau Pemansang Penyangkai Kapal madahka entara infrastruktur jalai ke bukai ti dikemansangka perintah mega iya nya Projek Jalai Trunk Kedua (STR) penyauh 222.7 kilometer ngaul jalai ari Samarahan-Sri Aman-Betong ti nyerangkung empat buah jematan ke beungkus RM5.58 bilion.
Ku iya, semua projek tu mandangka Premier Sarawak siku tuai ke manah sereta chukup ransing ngemansangka nengeri tu.
Projek ke udah dipadahka tu nyata udah dipeda benung dipejalaika sereta bisi sekeda udah tembu.
“Semua projek tu ukai jaku aja tang amat udah bejalai, kitai meda dua iti jematan di tasik nya endang udah bejalai, (Jematan) Batang Lupar udah bejalai lalau benung digaga.
“Reti nya, ari iring ketuai kitai Abang Jo endang ukai janji aja, iya ngaga projek nya tekala nya ungkup pengelantang semua kitai.
“Nyadi chukup nyata Perintah Sarawak dibaruh iring Premier udah mujur ngeranchakka agi pemansang ke pemaik rayat,” ku iya.
Sama bisi datai Premier Sarawak Datuk Patinggi Tan Sri Abang Johari Tun Openg, Kaban Parlimen Batang Lupar Mohd Shafizan Kepli, Kaban Kunsil Nengeri (ADUN) Beting Maro Razaili Gapor enggau ke bukai. -TVS
