BALAI RINGIN, 4 Jun: Pengerami Gawai Dayak ke diintu ba Rumah Jamit, Danau Melikin dirichah enggau bemacham aktiviti ke udah dilanggur dikena nanggam agi pemanah kaul peranak ba rumah panjai nya.
Tuai Rumah Jamit madah diri chukup gaga ati meda nembiak redak iya ulih begulai sejalai ngintu pengerami pengudah ke lama nadai betemu ketegal ti mayuh nitihka ‘periuk asi’ diri (gawa) di mengeri.
“Serak tu aku berasai gaga amat ati meda kitai serumah bela ulih duduk begempuru sereta gelumu ngintu Gawai Dayak ba balai raya tu.
“Nyadi aku ngarapka kaul kitai serumah terus teguh lalu terus seati meri sukung ngagai perintah awakka mayuh agi pemansang ulih dipinta enggau dikemujurka pengari rayat ungkup rumah panjai kitai udah tu ila,” ku iya.
Iya mansutka jaku nya rambau bejadika Pengerami Gawai Dayak 2023 ke diatur ba Balai Raya Kampung Danau Melikin, ditu kena 2 June tu tadi.
Dulu ari nya, Jamit bisi nguluka sida serumah ngemujurka Adat Niti Daun seraya bekena ke ngepan asal bepun ari pala tangga rumah iya empu lalu bejalai niti jalai alun ngelawa rumah puting setak mua ke sepiak kiba sebedau ke mulaika diri ngagai setak mua ke kanan sebedau ke sangkai ba balai raya rumah panjai nya.
Udah nya, program terus disambung enggau bemacham aktiviti ba balai raya baka mandangka main asal Ngajat, Pekit Nyepu Gelembung Anak Mit, Pekit Berebutka Mangku Kategori Nembiak enggau Orang Besai Tuai, Pekit Nyirutka Tuak Dalam Kong Plastik, Nyabut Tikit Betuah, Nyuaka Perais Gawai, Ngetas Ranyai enggau pengawa beperindang.
Berebak enggau nya, Jamit bisi madah sida serumah bisi merambu deka ngatur Pengerami Ngiling Bidai nyadika kelai nutup Gawai 2023 lalu pengerami nya ila ditaga deka dipenyadika Kaban Kunsil Nengeri (ADUN) Balai Ringin Datuk Snowdan Lawan.-TVS
