PAKAN, 22 Mei: Siku lelaki ditemu lemas pengudah diripotka lenyau lebuh ke tengelam maya nguji ngulihka jala iya ke tekait ba sungai Ulu Pedanum Pakan, lemai kemari.
Penusah ke nyadi urung pukul 12.00 tengah hari nya dipelaba nyadi maya tudah, Welly Tedung beumur 37 taun peranak rumah panjai Lubok Sagau ditu nyala ikan begulai enggau tiga iku agi bakih ke bukai ba Sungai Pedanum.
Tuai Balai Bomba enggau Penyah Penusah Bintangor, Penulung Penguasa Bomba Nicholas Belulin madah, bangkai tudah ditemu urung lima meter ari endur iya ke diripot lenyau kena pukul 4.15 lemai.
“Sebedau penusah nyadi, ku cherita tudah begulai enggau tiga agi bakih ke bukai benung nyala ikan enggau ngasaika jala iya bisi tekait ba tuga dalam sungai.
“Udah nya, tudah terus nyelam lalu nguji narit jala ke tekait.
“Terubah iya tudah bisi dipeda niki ke atas lalu udah nya nyelam baru bisi dua kali, tang lebuh ti enselur ketiga kali nyelam iya lalu dipeda nadai ayan agi.
“Bakih iya terus madahka pekara nya ngagai sida serumah lalu bini iya terus betesau madahka pengelelang tudah,” ku iya.
Beduduk ari nya, ku Nicholas seraban bomba ari Balai Bomba Enggau Penyah Penusah Bintangor terus ngesah palan penusah sepengudah nerima kangau tasah pukul 1.20 lemai.
Ku iya, raban Penyidi enggau Penyah Penusah (SAR) bejalaika pengawa ngiga nengah chara nyelam ari paras mua ai sebedau ke mujur tetemuka tudah urung pukul 4.16 lemai.
“Bangkai tudah udah dianjung ngagai raban polis ngambika diatur.
“Asil peresa beratika bangkai tudah agi meruan sereta nadai sebarang bakal.
“Bekau ari nya, aku deka meri terima kasih ngagai raban Polis, Opis Volunteer (RELA) enggau peranak rumah panjai laban udah mantu operasyen raban Bomba,” ku iya.-TVS
