KUCHING, 22 Mei: Sekeda tower telekomunikasyen ke udah tembu didiri Sarawak Multimedia Authority (SMA) enggau Sarawak Digital Economy Corporation Berhad (SDEC) tang nadai arus penyambung ngasaka ati rayat lebih agi sida diau ba menua ulu di Sarawak.
Menteri Komunikasyen enggau Digital Fahmi Fadzil madah diri udah ngasuh Komiti Komunikasyen enggau Multimedia Malaysia (MCMC) berandau enggau semua pengari serikat telekomunikasyen dikena mutarka penanggul ‘Network Sharing’ ungkup tower ke udah tembu didiri tang bedau ulih dikena.
“Berengkah bulan June tu ngaul sekeda sukut teknikal enggau mega pemereti ati ba renggat komersial.
“Aku pechaya nya deka ulih dikereja lalu aku ngarapka kitai ulih berengkah enggau mutarka penanggul arus komunikasyen ba Sarawak,” ku iya.
Fahmi mansutka penerang nya maya dirandau pemberita pengudah bejadika pengerami Hari Telekomunikasyen enggau Komuniti Berinformasyen Sedunya (WTISD) 2023 ditu, apin lama ke udah.
Dulu ari nya, ba jaku ti dipansutka Menteri Utiliti enggau Telekomunikasyen Sarawak, Datuk Julaihi Narawi madahka bisi 600 tower telekomunikasyen menua pesisir, Kaunsil Multimedia Sarawak (SMART) 4G digaga perintah nengeri nengah SMA enggau SDEC di serata Sarawak tang semina 70 tower SMART aja ke udah dikena enggau manah.
Tandu iya pengawa nirika tower nya beguna amat laban rayat menua ulu mega patut ngasaika perengkaguna telekomunikasyen enggau arus penyambung internet sebaka enggau rayat ke diau ba mengeri.-TVS
