KUCHING, 21 Mei: Yang Di-Pertuan Agong Al-Sultan Abdullah Ri’Ayatuddin Al Mustafa Billah Shah deka semua rayat Malaysia meretika penyerakup nyadi reta menua ti pemadu berega dudi hari.
Ku iya, penyerakup nya bepun ari rumah lalu rayat patut nyeliah ari betalatka bida enggau pangan diri awakka seraka kaul entara pupu bansa meruan dikedut.
“Munyi ku sempama dalam jaku Inggeris ‘charity begins at home’ senutuk enggau pekara ti dipadahka aku ditu iya nya ‘unity begins at home’ tauka penyerakup bepun ari rumah,” ku iya.
Al-Sultan mansutka jaku nya rambau Bejadika Minggu Penyerakup Menua Renggat Nasional di Waterfront Kuching ditu, tadi.
Dulu ari nya, penatai Agong dikelaluka Tuai Pemegai Menua (TYT) Nengeri Sarawak, Tun Pehin Sri Abdul Taib Mahmud enggau Menteri Besai Datuk Seri Anwar Ibrahim.
Sama bisi ngambat penatai Agong iya nya Premier Sarawak Datuk Patinggi Tan Sri Abang Johari Tun Openg enggau Sapit Menteri Besai Datuk Seri Fadillah Yusof.
Minggu Penyerakup 2023 ti diatur berengkah 20 nyentuk 28 Mei tu mega dipejalaika ba 15 bengkah endur di serata menua.
Entara nya di Bertam Square, Pulau Pinang, Dewan Komuniti Papar, Sabah, Dataran Tasik Kluang, Johor enggau Palan Rekreasyen Pantai Balok, Kuantan, Pahang.
Nungkatka rambai jaku ‘Perpaduan Dalam Kepelbagaian’, objektif ngatur Minggu Penyerakup iya nya dikena narak semangat penyerakup sereta ngerembaika penemu, pemereti enggau beratika penyelai adat sereta budaya dalam komuniti Malaysia.-TVS
