KUCHING, 19 Mei: Menteri Besai (PM), Datuk Seri Anwar Ibrahim ngelalau rayat seruran nerenak ulah ‘lita ’aarafu’ dalam pengidup besehari-sehari nyadi inisiatif awakka terus bebasaka pangan diri idup dalam menua benung mansang madani.
Ku Anwar, pemanah ulah nya bekaul enggau penelap enggau pangan diri lalu nya nadai limpang ari prinsip ‘lita’aarafu’ ti mai reti ukai semina ngelala (orang) tang mega ulah nya nyengkaum seruran bebasaka ke pangan diri.
“Lebuh aku bejaku pasal kaul penelap enggau mensia iya enda limpang ari prinsip ‘li ta aarafu’.
“…laban li ta’aarafu tu ngaku orang bukai mega bisi (enggau kitai), bisi raban bukai patut dikelala enggau dibasa, ukai semina belembut tang mega patut nemu, kitai ngelala lalu bebasaka bida baka ke dipadangka Premier kitai.
“Terima kasih lalu tu mega deka nyadi pengerandang ba Sarawak lalu kitai ngarap deka tegap ba menua Madani di Malaysia tu,” ku iya.
Iya madah munyi nya maya bejadika Licha Antarabansa Imam As-Syafie ba Palan Aum Borneo Kuching (BCCK), kemari.
Berebak enggau nya, Anwar muji licha nya laban manah dikena nyerungkai penemu enggau teknologi baru enda patut ditatak enggau pesaka penemu mensia ke diulih ba renggat pemun dalam pengidup.
“Sarawak, baka ke disebut dalam konvensyen sebedau tu di Kuala Lumpur, diperati dulu ke mua dalam sekeda pekara pemansang, ekonomi, teknologi, digital enggau teknologi gadung.
“Sehari tu dipeda penyikap iring tuai Sarawak deka ngetanka siti pekara ke pemadu berat dalam menua MADANI, nengeri patut lantang, maju tang patut tegap urat penemu,” ku iya.-TVS
