KUALA LUMPUR, 15 Mei: Opis Menteri Pemansang Indu, Ruang Bilik enggau Raban Bansa (KPWKM) deka bejalaika dua bengkah atur dikena negapka agi ekonomi rayat sereta nyadi sebagi ari chara dikena munaska penyeranta di Malaysia.
Menteri iya, Datuk Seri Nancy Shukri madah, atur keterubah iya nya nyendiaka latih pengelandik, penemu sereta nemu ngiring rebak baru dikena nyikap diri napi tangkup pengawa enggau dunya dagang.
Ku iya, perintah mega nyendiaka perengkaguna jali mikro enggau latih pekara wang enggau digital ngagai genap renggat komuniti.
“Tu beduduk ari sukut digital chukup beguna jam ke diatu sereta berupai dipeda maya Pandemik COVID-19 bala pemain industri lebih agi ba bidang dagang begunaka pelasar dikena ngelakuka produk dijual sida.
“Kitai mega udah ngelala bagi kebuah ke nagang peluang dagang enggau chara beridup ba mayuh endur laban genap sitak ngembuan penanggul ke bebida,” ku iya.
Iya madah munyi nya maya Konvensyen Nasional Perintah Penyerakup 2023, ditu kemari.
Berebak enggau nya, Nancy mega merambu perintah neruska program Adopt A-Village laban nya ulih dikena nyungkak sitak genturung pendiau.
Ku iya, siti ari inisiatif perintah iya nya nyendiaka perengka internet di menua pesisir kelimpah mantu sida ngerembaika makit produk asil betanam betupi ngagai serata dunya.
Udah nya, atur kedua ti deka dipejalai iya nya nengah chara negapka ekonomi orang indu.
“Beduduk ari populasi indu semina manggai 15.4 juta tauka sama enggau penyampu 47.7 peratus ari semua pengani di Malaysia, nya alai beguna amat kitai mai sida ke indu dalam ngemansangka ekonomi,” ku iya.
Tandu iya, beguna amat kitai nentuka orang indu disikap enggau mayuh penemu, pengelandik enggau penemu dagang sereta mega pengelandik nyadi ketuai.-TVS
