KUCHING, 15 Mei: Program Heritage Food Festival ke diatur pengelama dua hari berengkah hari enam ke udah endang pelasar pemadu manah dikena mantaika produk pedagang di menua tu nengah produk pemakai enggau dagang temuai.
Datuk Bandar Kuching Selatan, Dato Wee Hong Seng madah program ke diatur Pesaka Kulinari Enggau Gerempung Seni Sarawak (CHASS) nya semitan amat enggau pekara ke udah diaku Serakup Pelajar, Saintifik enggau Main Asal Gempung Bansa Sedunya (UNESCO) ba kategori Gastronomi.
“Kuching dikelala nyadi serega pemakai, lalu kami begunaka saup pedagang menua tu mantaika mayuh agi penyelai ke bisi ba sitak menua tu.
“Pedagang mega diperansang bekunsi penemu senentang baka ni kami ulih mantu ngelakuka produk dagang temuai tu, pedagang ngatur randau enggau komiti CHASS, lalu kami deka muka mayuh agi peluang ngagai mensia mayuh,” ku iya.
Wee madah munyi nya maya pengawa nutup program Heritage Food Festival beserimbai enggau Karnival Pengerami Gawai, diatur ditu kemari.
Karnival nya diatur baru pengudah tiga taun nadai diatur bekau ari pandemik Covid-19 lalu nyadi lumpar ke-4 diatur dikena ngelakuka pemakai enggau kraf pesaka Sarawak.-TVS
