SEREMBAN, 13 Mei: Pasar Tamu Dayak Seremban di Negeri Sembilan meruan dibuka ngagai mensia mayuh lebih agi anak Sarawak ke nadai pulai ke menua nyerumba pengerami Gawai ti deka datai.
Chairperson Pasar Tamu Dayak Seremban, Padila Jiahong madah, Tamu Dayak tu entara palan dagang temuai budaya ke bisi di Negeri Sembilan.
“Endang udah nyadi tanggungpengawa pedagang di tamu tu bejual produk baka selama taja pan musin pengerami.
“Sapa-sapa bala kaban belayan ke nadai pulai Gawai, datai mih ke pasar kitai (Tamu Dayak Seremban) bebelika barang ke diguna diri seraya betemu enggau bala ke sama menua ditu,” ku iya.
Padila madah munyi nya ngagai TVS di Pasar Tamu Dayak Seremban, apin lama.
Tamu Dayak tu bepalan ba Jalai Wong Yik Tong, Taman Sri Rahang Seremban ulih deka dibuka baka selama iya nya berengkah pukul 8 pagi nyentuk 12 tengahari ninting Hari Minggu.
Ungkup penemu, Tamu Dayak Seremban tu digelar ‘Mini Sarawak di Bandar Saroban’ lalu ngaul 30 iku pedaja nyangkaum kaban Gerempung Indu Borneo Seremban (PRAISE).
Tebal agi sida ke bedagang di tamu tu endang raban indu ke asal ari Sarawak.-TVS
