KUCHING, 11 Mei: Perintah Sarawak ngembuan juluk ngerikodka novel Melayu pemadu tuai ba dunya ti dichelak ba Sarawak iya nya ‘Hikayat Panglima Nikosa’ diaku Serakup Pelajar, Saintifik enggau Main Asal (UNESCO).
Sapit Premier Sarawak, Datuk Amar Awang Tengah Ali Hasan madah novel ke beumur 147 taun nya udah ditemu ba sebuah librari di London.
“Topik iya Hikayat Panglima Nikosa, nyeritaka pemerinsa jeman perang nyentuk ngasaika penyenang.
“Naka diatu, pengawa nyelak enggau sekeda pengawa ngerikod benung dipejalai ngambika dokumen nya dichalun ba renggat dunya, dipasuk ba data UNESCO,” ku iya.
Iya madah munyi nya maya mantaika jaku pengelalu ba pengerami SAMArindok Aidilfitri diatur Amanah Khairat Yayasan Budaya Melayu Sarawak (AKYBMS) di sebuah hotel tebilang ditu, malam tadi.
Ngelansa pasal sejarah nyelak novel di Malaysia, ku Awang Tengah pemansik mayuh bemalinka novel ‘Hikayat Faridah Hanum’ nyadi novel Melayu pemadu tumu dichelak.
Tang, ku iya pansik ba pun taun 2000 tetemuka bisi karya bukai baka novel ke dichelak ba taun 1876 di Kuching, Sarawak, iya nya ‘Hikayat Panglima Nikosa’.
“Novel ke beumur 147 taun nya diasilka nengah chara litografi (dichelak atas limpir besi tauka batu) kena 30 June 1876 di Bukit Persinggahan Kampung Boyan, Kuching, Sarawak,” ku iya.
Iya mega madahka penulis novel nya siku tukuh sasterawan Melayu moden enggau tebilang ba Sarawak. -TVS
