KUCHING, 11 Mei: Sarawak begunaka 6,000 iku raban teknologis profesional dikena nyapai juluk nyadi penengkebang Revolusyen Industri 5.0 (IR5.0).
Premier Sarawak Datuk Patinggi Tan Sri Abang Johari Tun Openg madah, Sarawak nyaran deka ngembuan 10, 000 iku teknologis manggai taun 2025.
Taja pia, ku iya madah, naka ke diatu, Sarawak semina ulih nempa urung 30 peratus ari saran nya.
“Di Sarawak kitai bisi 1,961 iku graduet teknologi, juruteknik profesional (461), teknologis profesional (722) enggau juruteknik profesional (147).
“Tu bereti kitai bisi 3,291iku teknologis profesional. Nyadi kitai begunaka 6,000 iku agi. Kitai mega ngarapka ulih nyapai saran nya taun 2025. Engka bisi pemar tang kitai mesti chukup teknologis manggai taun 2030,” ku iya.
Iya mansutka jaku nya rambau bejadika program Simposium Borneo Lembaga Teknologis Malaysia (MBOT) 2023 lebuh Hari Empat.
Premier madahka saran Sarawak nya ulih dijapai nengah kerejasama nengeri enggau sekeda institusyen enggau kompeni baka Gerempung Juruteknik enggau Juruteknologi Profesional (APTT), MBOT sereta Universiti Malaysia Sarawak (UNIMAS).
“Pekereja ti bepengelandik tinggi nyadi tulang belakang ngagai semua ekonomi. Sida tu mih raban profesional ke ngemudi institusyen kitai, nentuka kilang kitai beoperasyen lanchar, mantu pekebun ngeluarka mayuh asil kebun. Pia mega diatu kitai benung deka beratika pengulih umai paya ba Gedong.
Kelimpah ari nya, nentuka penyikar mesin ke dikena sereta nyungkak pemansang inovasyen,” tandu iya.
Berebak enggau nya Abang Johari nerangka sekeda industri begunaka pekereja baka injinir enggau pemansik sebedau ulih ngasilka teknologi tauka servis ke bekaul.
Temuai bukai ke ngulu program nya, Presiden MBOT, Datuk Ts. Ir. Dr Siti Hamisah Tapsir enggau Chairman Palan Penyulut Teknikal Sarawak (CENTEXS) Tan Sri Datuk Amar Mohamad Morshidi Abdul Ghani.
Dalam program nya mega, Abang Johari ngemataka pengawa besilih Sempekat Pemereti (MoU) entara MTOB enggau lapan kaban panel pakar teknologi ke nyerangkung Wawasan Open University, Sarawak Skills, i-CATS University College, SDEC, CENTEXS, Swinburne University, Mega Aerospace Sdn. Bhd. sereta Alliance MEP (Sarawak) Sdn. Bhd. – TVS
