SIBU, 8 Mei: Siku orang ke gawa enggau serikat utiliti udah nadai (parai) dipelaba kena strok angat maya ke benung gawa ba sebuah tower pemagi karan ba Jalai Paradom, ditu, kemari.
Tuai Polis Pelilih Sibu, Asisten Komisioner (ACP) Zulkipli Suhaili madah, raban sida nerima kangau ari Raban Penyaga Orang Periman Malaysia (APM) pasal penusah nya pukul 3.15 lemai.
“Pansik tumu polis, beratika tudah ke mega peranak menua tu begulai enggau bala bakih ke sama gawa ngaduka pengawa ba endur nya.
“Bakih tudah madah ketegal gaya hari ke balat angat maya nya ngujungka tudah ngaga pemutus berendam ba sungai ke semak,” ku iya.
Taja pia, ku iya tudah sebana madah diri deka luput lalu terus nadai ngeleda pengudah iya berendam ba sungai.
“Raban ambulans ari Sepital Sibu ke bisi datai ngenuku ke tudah udah nadai ba endur penusah nyadi pukul 4.59 lemai,” ku iya.
Tudah ke nadai iya nya Mohammad Sabeli, 52, asal ari Sri Aman.
Nitihka penerang bakih tudah, Hashimuddin Abdul Rani, seduai iya niki tower 30 meter peninggi nya laban deka muai sarang burung urung pukul 12.15 tengah hari.
“Gaya hari ti balat angat maya nya ngujungka kami duai ngenduh urung 15 minit, tang tudah agi madah diri enda nyamai isi lalu minta aku ngurut bahu iya ngicha tubuh regas agi.
“Tang selang beberapa minit udah nya, iya ngalika diri lalu nadai ngeleda agi,” ku iya.
Zulkipli madah kes nya dikategorika mati ngenyit (SDR). -TVS
