KUCHING, 7 Mei: Pengerami Beserumpu Aidilfitri Komiti Indu Parti Pesaka Bumiputera Bersatu (PBB) Pampang Satok diperati ulih dikena negapka agi pemanah kaul entara kaban PBB lebih agi raban indu.
Kaban Kunsil Nengeri (ADUN) Satok ke mega Tuai Pampang PBB N8 Satok Dato Ibrahim Baki, sukung ari raban indu dalam parti chukup beguna enggau patut nyadi chunto ngagai pampang bukai sereta pating-pating ke bukai ba selampur Sarawak.
Iya berebak enggau nya muji pengawa komiti Indu PBB Pampang N.28 laban udah bekenanas gawa rambau pengerekai Covid-19 nengah chara nyadi bantu baka bakul pemakai enggau ubat ngagai peranak ba sitak Satok.
“Sida ke indu ukai semina maya Covid-19, udah Covid pan sida meruan gawa nyentuk ke sehari tu.
“Nya alai, maya PRN ke udah, ketegal sida ke indu tu, maya nya agi bisi Covid-19 sida bebendar gawa dibaruh iring Datuk Dayang Madinah di rumah, bekimpin ari pintu ke pintu rumah lalu Puji Tuhan, kitai bulih pemujur menang besai, menang enda disadang nyentuk raban orang ke dilaban bela lenyau chengkeram,”ku iya.
Iya madah munyi nya maya Pengerami Beserumpu Aidilfitri Komiti Indu PBB Pampang N8 Satok ditu, kemari.
Sama bisi datai bini Datin Noorakmar Hamdan enggau Tuai Komiti Indu N8 Satok Salina Mohd Salleh.
Nangkan ke nya, Ibrahim madah diri berasai betuah laban diberi peluang bekerejasama enggau tuai indu ke suba nyentuk taun 1985.
“Tuju pengawa kitai ukai ungkup diri empu aja, tang ungkup semua komuniti, gawa begulai.
“Aku berati ari pun aku masuk pengawa politik di Satok tu nyentuk ke sehari tu, kitai gawa begulai.
“Nya kebuah tadi aku madah, (kerejasama) pengering PBB. Nyadi, kitai belajar ari Premier kitai enggau Premier kitai tu ari Mendesah tu mayuh sejarah laban bisi dua iku Kepala Menteri ke ada lalu besai ari Kampung Mendesah,”ku tusui iya.
Ungkup penemu, bisi 15 pating ari PBB Pampang N8 Satok nyengkaum urung 300 kaban indu PBB bisi datai ngerichahka pengerami nya.-TVS
