BINTULU, 7 Mei: Pengawa ngatur Pasar Gawai Dayak nyerumba pengerami Gawai 2023 nyadi pelasar ke chukup manah laban ulih dikena narak penemu bedagang ngagai raban ti baru nguji ngemeranka pengawa nya nyadika pun penatai pemisi.
Ku Menteri Ba Opis Premier Sarawak, Datuk John Sikie Tayai, pengawa ke Diatur Gerempung Pemansang Dayak Bintulu (BANGUN), ukai semina mantu nyungkak penatai pemisi mensia mayuh, tang mega ulih narak penemu dagang ngagai sida ke mekuhka pengawa bejual barang.
“Nyadi, pekara ke udah diterangka Chairman BANGUN tadi chukup besai reti.
“Kesatu, iya ulih dikena nambahka penatai pemisi enggau mega kitai ulih belanjaka pekara ke bekaul enggau dagang.
“Nya alai, aku meda tu chukup beguna ngagai kitai. Aku meri puji enggau pengaga ati ngagai BANGUN,” ku iya.
Iya madah munyi nya maya bejadika Pasar Gawai Dayak BANGUN bepalan ba Tamu Emart Bintulu ditu, empai lama.
Berebak enggau nya, John Sikie ke mega Kaban Kunsil Nengeri (ADUN) Kakus ngarapka, program ke baka nya agi ulih diatur baru dudi hari ngambika meri pemaik ngagai sida ti mekuhka pengawa dagang.
“Aku ngarapka aktiviti tu diatur ninting taun ngambika ulih narak penemu sereta pengelandik lebih agi ngagai kitai bansa Dayak ke bedau nyengala landik ba dunya dagang,” ku terang iya.
Ungkup penemu, entara aktiviti ke bisi diatur dikena ngerichahka agi program Pasar Gawai BANGUN tu iya nya Malam Main Asal diatur kena 3 Mei, nyadung kuih penyaram (4 Mei) enggau Pekit Nyumpit BANGUN (6 Mei). -TVS
