DALAT, 6 Mei: Siku orang berikan beumur 58 taun bebadi nyawa pengudah ditagup baya ba sebuah sungai di Kampung Boom, Oya ditu, malam tadi.
Tudah ke bebadi tu iya nya Roslin Madaie peranak Kampung Boom, Oya, dipelaba ditagup lalu dibatak baya ke dalam sungai maya benung nyala undang di sungai nya urung pukul 10.30 malam.
Tuai Polis Pelilih Dalat, Deputi Superintendan (DSP) Saga Chunggat madah, penusah nya dipadahka orang periman ti betelefon ngagai iya pukul 11.26 malam.
“Bepelasarka penerang saksi penusah nya, tudah ditagup siku baya maya benung nibarka jala ari bot iya sebedau ke ditarit ke dalam Sungai Batang Oya,” ku iya maya dirandau TVS.
Bekau ari penusah nya, ku iya bakih tudah minta sah sida serumah ngiga tudah ke udah ditagup baya ba palan penusah nyadi.
“Udah nya, sida serumah terus nguji ngiga tudah ngena chara tradisional iya nya ngetan ginti ba sekeda bot.
“Maya ti nyidi urung tiga jam udah nya, tali ginti ke ditan sebuah sebuah bot tekait ba baju tudah ti ditagup baya urung pukul 12.30 tengah malam,” ku iya.
Taja pia, ku iya tudah endang udah nadai ngelala orang agi pengudah mujur dibatak ari sungai.
Ku iya, penusah nya kes serang baya ti kelapan diripotka ba Balai Polis Oya, Dalat.
“Ari lapan kes nya, enam tudah sida ke ditemu bebadi nyawa lalu dua iku idup,” ku iya.
Bangkai tudah diserah ngagai raban polis ngambika dibai ngagai Sepital Dalat ungkup atur bekaul.
“Pengudah diperesa Pegawai Perubat enggau Pegawai Pansik beratika bakal ba tubuh tudah berupai amat ngayanka abi tagup jelu mangah,” ku iya.
Kes dikategorika Mati Ngenyit (SDR). – TVS
