SRI AMAN, 1 Mei: Sapit Menteri Pelajar, Inovasyen enggau Pemansang Bakat, Datuk Francis Harden Hollis udah bejadika Projek Jalai Semin nuju ngagai Pendam Anglikan Sutong, ditu apin lama ke udah.
Ku iya, projek tu berengkah digaga 3 Oktober 2022 lalu tembu kena 24 Disember 2022.
Ku Harden, projek jalai tu digaga nguna agih ti diberi perintah sarawak nengah Unit Pekara Pengarap Bukai (UNIFOR) sepenyampau RM100,000.
Iya ke mega Kaban Kunsil Nengeri (ADUN) Simanggang madahka, penumbuh UNIFOR ngayanka perintah Sarawak berupai ngemeratka pengelantang raban pengarap enggau pupu bansa di menua tu.
Ku iya nerang, Sarawak aja nengeri dalam Malaysia ti bisi ejensi khas mantu pengarap bukai dalam nyendiaka turu ungkup projek, aktiviti rumah sembiang, tepikong enggau kuil.
Ba pengawa nya, Harden bisi meransang raban kaunselor nengah Opis Pelilih ngatur Kimpin Pemeresi ngambika lori ngumpul uras ulih dianjung nyaup ngemujurka pengawa beripai meresi pendam nya.
“Bejaku pasal pemeresi, aku meransang raban kaunselor tau ngatur siti progam baka kimpin pemeresi (ngupas pendam).
“Pinta lori nengah opis kaunsil awakka ulih nyaup kita ngemujurka aktiviti beripai meresi Pendam Sutong ditu,” ku iya.
Nangkan ke nya, Chairman Komiti Pendam, Anglikan Sutong Edmeade Rujis meri terima kasih enggau puji ngagai Harden ti mayuh udah mantu ba pemansang gerija nyengkaum Projek Mit Menua Pesisir (MRP).
Urung 200 iku bisi ngambi bagi ngemujurka pengawa beripai ensiang pendam nya ti ngaul raban PCC, AWF, AYF enggau kaban belayan sida ti dikuburka ba pendam nya.-TVS
