MIRI, 30 April: Kampung Long Bedian diperati ngembuan penau dikemansang ari sukut industri dagang temuai bekau ari pemisi budaya sereta pengemerah pengani ba endur nya.
Ku Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah, penyelai nya ulih nyadi produk dikena matak temuai luar datai ke Kampung Long Bedian.
“Aku deka meda Long Bedian mansang. Aku ulih meda sitak tu ngembuan penau ke chukup besai. Utai ke dipeda tadi, tanda Kayan, Kenyah, kelabit enggau Penan, semua chukup manah dipeda.
“Tu mih meri pemaik enggau pengangkat produk ba sitak sida empu.
“Sida ke datai ari luar nadai ngembuan pekara ke baka tu, di nengeri tauka endur sida.
“Kelimpah ari nya, siti agi penyelai ke patut kitai jaga ba sitai tu iya nya pengelantang rayat.
“Taja kitai bebida bansa enggau pengarap, kitai ulih idup lantang senang. Tu ke patut kitai jaga,”ku iya.
Karim mansutka pekara nya ba Program Sarawak Highland Folks Music And Dance Festival Kelima di Long Bedian, apin lama.
Udah nya, iya ke mega Menteri Nembiak, Lumba enggau Pemansang Dagang Sarawak mega bisi merambu ngasuh ngaga baru nama pengerami lalu nepu nama long bedian ba edisi keenam ti deka datai nyadika chara dikena ngelakuka Long Bedian ngagai orang luar.
Berebak enggau nya, iya madah, Orang Ulu di Sarawak endang kaya enggau adat sereta budaya ke jarang dipeda orang luar, nya alai pekara nya patut diangkat dikena nyungkak industri dagang temuai Sarawak.
“Orang Ulu sebaka enggau komuniti bukai ba Sarawak, sida kaya enggau adat.
“Tu mih anugerah ke diberi Tuhan ngagai komuniti Orang Ulu lalu kini aja kitai bejalai, ari sukut tanda, budaya bukai enggau pemakai ke nyelai.
“Pekara-pekara baka tu chukup manah enggau dikerinduka orang luar.
“Kitai ke diau ditu nadai ngasai laban genap pengerami baka Krismas, kitai ulih meda tanda enggau pemakai nya besangkut paut enggau komuniti kitai.
“Tang ba orang luar ke diau ba endur bukai, tu mih pekara ke manah ulih diangkat nyadi produk dagang temuai,” ku iya.
Sarawak Highland Folks Music And Dance Festival diatur dikena ngelaku enggau ngerichahka program seni pemerindang muzik asal orang ulu.
Sama bisi datai Sapit Menteri Dagang Temuai, Industri Kreatif enggau Seni Pemerindang Sarawak, Datuk Sebastian Ting Chiew Yew, Kaban Kunsil Nengeri (ADUN) Telang Usan ke mega Chairman Kaunsil Dagang Temuai Sarawak (STB), Dennis Ngau, Sapit Residen Bahagian Miri, Juan Unit enggau Pemangku Pegawai Pelilih Telang Usan, Ping Anyi Ngau. – TVS
