LIMBANG, 29 April: Pesta Badudun (ngabang) enggau Lumba Kerbau 2023 Edisi Ke-9 iya nya siti agi aktiviti besai dalam Kalendar Dagang Temuai Nengeri Sarawak ditu, deka diatur kena 19 nyentuk 21 Mei tu.
Program identiti ngagai lebih 30,000 komuniti Melayu di utara Sarawak ke diatur kenyau ari 2012 nya deka diatur ba Kampung Lubuk Sigantang pengelama tiga hari.
Sapit Menteri Industri Pemakai, Komoditi enggau Pemansang Wilayah Sarawak (M-Ficord), Datuk Dr Abdul Rahman Ismail madah, program diatur Gerempung Melayu Limbang (PML), Gerempung Penginang enggau Lumba Kerbau Limbang (PPLKL) begulai enggau Opis Residen Bagi Menua Limbang dipelaba deka dipenyadika Sapit Menteri Besai, Datuk Seri Fadillah Yusof.
Kaban Kunsil Nengeri (ADUN) Bukit Kota nya madah, Pesta Badudun enggau Lumba Kerbau siti agi program besai ke diatur ba utara Sarawak lebih agi ba Limbang endur ngemataka main ke chukup ngerindang ati iya nya lumba kerbau.
“Siti agi main iya nya lumba kerbau enggau Puji Tuhan taun tu kitai deka ngatur main nya ba Lubuk Sigantang kena 19 nyentuk 21 Mei tu lalu dipelaba deka dipenyadika ba hari kedua iya nya 20 Mei (Hari Enam), dikemujurka Sapit Menteri Besai Malaysia, Datuk Seri Fadillah Yusof.
“Kitai bisi ngabas taba nya dikena nentuka penyikap diatur enggau manah lalu kitai naka ulih nentuka palan endur ngatur main nya likun,” ku iya madah ngagai media pengudah ngabas taba pengerami nya ba Kampung Lubuk Sigantang kemari.
Iya madah, ‘badudun’ mai reti ngabang dipasuk abis nadai 14 buah genturung pendiau Melayu di sepanjai tebing Sungai Limbang lalu deka ngemataka bemacham main diatur kelimpah ari lumba kerbau.
Ku iya, pengerami serak tu deka mantaika adat enggau penyelai komuniti Melayu ari segi ngias langkau, pekayan enggau pemakai asal.
Berebak enggau nya, iya mega ulih mandangka genturung pendiau di pesisir sungai Limbang nyadi kelang lumba kerbau baru sereta mulaika pengingat lumba kerbau endang kala tebilang kelia.
Dipelaba lebih 40 iku kerbau deka dipekitka mungkur lumba beganti-ganti, kerbau besai enggau mit.
Ku iya, bemacham program besai dibaruh Komiti Pengerami Besai Pelilih Limbang deka diatur bepelasarka etnik enggau adat sepanjai taun sepengudah pandemik COVID-19 ngeruga menua lebih dua taun ke udah.- TVS
