MUKAH, 29 April: Sitak Lembah Rajang dikelala nyadi sebengkah endur ke bisi penau nyadi pun penatai pemisi baru nengah dagang karbon.
Premier Sarawak, Datuk Patinggi Tan Sri Abang Johari Tun Openg madah, kebuah pia laban selampur sitak Kuala Rajang dibungkur kayu bakau.
“Selampur sitak Kuala Rajang tu dibungkur kayu bakau ke ulih nyimpan karbon.
“Arapka, selampur sitak kayu bakau tu deka meri asil ngagai Sarawak nengah penguna karbon,” ku iya maya bejaku ba Pengerami Bejadika Pesta Kaul Mukah 2023, ba Taba Kaul Kala Dana Mukah ditu sehari tu tadi.
Dulu ari nya, Sapit Menteri Perambu Mengeri, Pangatur Tanah enggau Rampa Menua, Datuk Len Talif Salleh madah, madang kerapa di sitak nya ngembuan pengelebih kediri empu dalam nyimpan 10 kali lipat karbon dibanding enggau kayu bukai.
Lebih ngerindu ati ku iya, Kuala Rajang ngembuan sitak kampung madang kerapa ke pemadu besai ba Malaysia.-TVS
